12 декабрьыште Йошкар-Олаште, Сеҥымашын ХХХ идалыкше лӱмеш тӱвыра полатыште, калык усталык шотышто республикысе фестивальын лауреатше-влакын «Калыкын чонжо» гала-концертышт лиеш.
Тиде фестиваль эше шошымак тӱҥалтышым налын. Ондак районлаште эн сай коллектив-влакым ойыреныт. Вара кундемысе конкурсышто сай гыч сайжым палемдыме.
А тиде гала-концерт фестивальым иктешла. Лауреат ден дипломант-влак чапле программым ончыктат.
Нунын коклаште Морко культур да каныме рӱдерын академле* калык хоржо да «Рвезылык» куштышо калык ансамбльже, Марий Турек гыч «Рвезылык» куштышо да мурышо, Кужеҥер район, Йывансола гыч «Мурсескем», Марий Турек районысо Сысоево гыч «Савак кундем», «Зардон» калык фольклор ансамбль-шамыч, У Торъял районысо Лумарий гыч «Шӱшпык» йоча тевыкле* калык семӱзгар оркестр*, Советский кугыял* гыч «Сувенир» семӱзгар коллектив*, Советский районысо Кужмарий гыч «Эр ӱжара» калык фольклор коллектив, Шернур районысо Койсола гыч «Ӱжара», Советский районысо Михайловка гыч «Чодыра муро», Параньга районысо Ондропсола гыч «Поро кас» куштышо да мурышо калык ансамбль-влак да молат лийыт.
Тиде гала-концерт жапыштак калык усталыкым вияҥдымашке кугу надырым пыштымыштлан, эн чот ойыртемалтше культур пашаеҥ-шамычлан Марий Элын Тӱвыра, печать да калык-влакын пашашт шотышто министерствыжын 2008 ийлан «Калыкын чонжо» премийжым кучыктат.
Налмывер: “Марий Эл” жаплышташ
*академле — академический, тевыкле — образцовый, калык семӱзгар оркестр — оркестр народных инструментов, кугыял — поселок, семӱзгар коллектив — инструментальный коллектив.
MariUver 