Сӱрем, эрвел марий-влак тудым Кӱсӧ маныт, акрет годсо чимарий пайрем улеш. Тений тудо 11-ше июльышто тӱҥалеш да 18-ше марте шуйна.
Сӱрем олык марий да пошкырт марий-влак коклаште аралалт кодын. Кызыт Марий Элын Морко, Юлсер районлаштыже, Пошкырт кундемыште да моло вереат пайремлат.
Сӱрем кеҥежым кечын эн кӱшнӧ лийме жапше деч вара кум арня эртымеке пура. Тудо руш Петро пайрем дене пырлярак толеш. Айо ожно арня мучко шуйнен. Пайремын икымше кечыже карт-влакын мутланен келшымышт почеш палемдалтын.
Сӱрем юмыйӱла радамым шуктымаште кумда верым налеш. Кеҥежым эртарыме моло пайрем-влак коклаште ик эн тӱҥ да жаплыме семын палемдалтеш. Сӱрем годым кугу тӱткылыкым надырым пуэн кумалмылан ойырат.
Пайрем тӱҥалтыште, ончычсо пагытлан, кинде пеледме жаплан увертарыме, Мланде Аван тымыкшым аралыше ойӧрӧм чарыме йӱлам эртареныт. Тыге нуно озанлык да еш сомылым тӧрлен шогымаште Юмын поро кумылжым йодыныт.
Сӱремын шке йӱла радамже лийын. Пайрем годым сӱрем отышто (кӱсотышто, кӱсӧ олмышто — эрвел марий-влакын) кумалтыш эртаралтын. Кумалме деч вара сӱрем мужым (осал шӱлышым) поктымо йӱла шукталтын. Рвезе-влак кугу йӱк-йӱаным луктын имне дене ото йыр, пасу мучко, ял покшеч кудалыштыныт да сӱрем пучым пуалтареныт, сурт лукым сола дене лупшеныт, пуч ден солам пудыртен, палемдыме верыш кудалтеныт але чодырасе укшеш сакен коденыт.
Пайрем йӱлам шуктымо годым тамакым шупшаш, аракам йӱаш, уда шомакым ойлаш, йӱк-йӱаным лукташ ок йӧрӧ. Кумалтыш эртыме кечылаште эҥерыште йӱштылын але мончашке пурен кап-кылым лывыртеныт.
Пайремым муро да куштымаш, весела модмаш мучашлен. Моло пайрем семынак оза-влак унам вашлийыныт, тамле кочкыш-йӱыш дене сийленыт.
Сӱрем пайрем Марий Эл Морко район Яксола ялыште, 1992 ий:
MariUver
MariUver 