Таче, пеледыш тылзын 4-ше кечынже, Эстоний канде-шеме-ошо калыкле символжым чапландарен, шке тисте кечыжым пайремла. Лач ты кечын шочшо тиде флаг калыкым, тудын йылмыжым, тӱвыражым да шкешамжым почын пуа.
Историйыште икымше эстон флаг (фотошто), кудыжо Тарту студент ушемын лийын, рӱдӧ экспонатлан шотлалтеш. Тудым Эстон калык тоштерын (ЭКТ) «Калык ден кугыжаныш» залыштыже «Вашлиймаш» лӱман эре улшо ончерыштыже ужаш лиеш.
Флагын историйжым да мом ончыктымыжым келгынрак пален налаш шонышо-влаклан архив материал негызеш ыштыме подкаст-влак улыт. Нуно тӱрлӧ еҥын шарнымашыж дене палдарат, да тисте эртыкын тӱрлӧ шӧрынжым почын пуат.
Тылеч посна, Эстон книга 2025 ий шумлык лӱмын ыштыме вашталтше тисте-влак дене витриныште Тарту оласе комлышо ушемын тистыже ончыкталтын. Тудын историйжым тыгак ЭКТ-ын сайтыштыже шымлаш лиеш.
Тачысе кечат Отепяште кӱлешан событий дене палемдалтын. Эстон тисте рӱдерыште ЭКТ-ын «Мемнан тистынан историйже» лӱман куснылшо ончерже почылтын. Тудо Эстонийын калыкле тистыжын кӱлешлыкшым да калыплалтмаш корныжым да эстон идентичностьышто тудын рольжым келгынрак почын пуаш ышталтын.
MariUver
шкешам – самосознаний,
комлышо – переплетчик,
калыплалтмаш – формирований
MariUver 