Эстон калык тоштер (ЭКТ) выставкышт-влак дене палыме лийме йӧным умбакыжат саемдаш тырша. Тӧнеж «Урал йӱксавыш» эре улшо финн-угор ончерын тӱҥалтыш ужашыштыже да пермь калык-влакын залыштыже тифлокомментариян онлайн-экскурсийм ыштен шуктен.
Ончыч тоштер шке блогыштыжо фотографий-влак пелен тифлокомментарий-влакым вераҥден да «Вашлиймаш-влак» экспозицийлан тыгаяк вот-турым ямдылен. Ынде «Урал йӱксавышын» ончылмутшым, коми да удмурт-влак нерген секций дене палдарыше аудио- да текст файл-влакым музейын лаштыкыштыже колышташ да тушеч шупшыл налаш лиеш.
21-ше агаште ЭКТ тиде зал дене палдарыше верыштак эртыше тифлокомментариян экскурсийышкат ӱжеш. Садет 13:00 шагатлан увермеҥге гыч тӱҥалеш. 14:00 шагатлан финн-угор кочкышым (шаньгым) ямдылыме мастар-класс эрта, тушто лийме ак – 4 евро. Сийым кӱэштме жапыште аралыше Сирет Саар тоштер фойеште улшо лудмо лукла дене палдара.
Экскурсийыште але мастар-классыште лияш шонышо-влакым толмышт нерген электрон почтыш увертараш йодыт. Начар тазалыкан еҥ-влак музейыш кузе толын кертмышт нерген информацийым ЭКТ-ын сайтыштыже вераҥдыме.
Тифлокомментарий-влакым Эстон шанче агентствын грантше кӱкшытеш ямдылыме, увертара ЭКТ.
MariUver
Фото: ЭКТ
вот-тур – веб-тур,
увермеҥге – инфостойко
MariUver 