Ӱярня тылзын 29-ше кечынже Челна оласе «Памаш» калык-влакын келшымаш пӧртыштышт «Челна оласе марий-влакын калыкле-тӱвыра автономийышт» верысе мер организацийлан 35 ий темме да «Марий сем» калык марий фольклор ансамбльлан 33 ий темме лӱмеш пайремле мероприятий лиеш.
Тудо Челна олаште Марий тӱвыра кече кышкарыште эртаралтеш да 14:05 ш. тӱҥалеш . Чыла кумылан-влак яра пурен кертыт.
«Марий сем» калык фольклор ансамбль 33 ий наре оласе да республикысе калыкым шке мурсаскаж дене куандара. 1990 ий гыч ансамбль Челнасе ден Татарстанысе веле огыл, тыгак Марий Элысе, Киров областьысе, Удмуртийысе тӱвыра мероприятийлаште чолган участвоватла, марий калыкын шкешотан тӱвыражым, мурыжым, куштымашыжым, йӱлажым да илыш-койышыжым арален кодаш да шараш полшен шога.
Пайремыште тыгак кушкын толшо тукым – «Эрвий» марий тӱвыра, йылме да йӱла клубын участникше-влак лийыт. Тидыже тӱрлӧ тукым кокласе вашкыл улмо да йӱлам арален кодымо нерген ойла.
«Марий сем» ансамбльым Российыште веле огыл, тудын деч ӧрдыжтат палат. 2006 ийыште тудо Эстон Республикыште Финн-угор родо-тукым калык-влакын кечылаштышт лийын.
Эртарыше-влак олаште илыше да уна-влакым марий калыкын поян тӱвыраж дене палыме лияш ӱжыт.
Рушла Telegram-ыште лудса /
По-русски читайте в Telegram:
https://t.me/mariuver/458
MariUver
MariUver 