Нарвыште илыше-влаклан ончыктат
Ӱярня тылзын 1-ше кечынже Нарва рӱдӧ книгагудышто Финн-угор калык-влакын 2025 ийысе тӱвыра рӱдолажым почмо шумлык «Финн-угор йылмыла дене Библий» ончер шарыме лиеш. Тудым тӱвыра учреждений Эстон Библий ушем дене пырля эртара.
Экспозиций Библийым да тудын посна ужашыже-влакым тӱрлӧ родо-тукым йылмылаш кузе кусарымым ончыкта. Толшо-влак финн-угор калык-влакын возыктышышт кузе шочмым да вияҥ толмым шуэн вашлиялтше савыктыш-влак гоч ужын кертыт.
Ончер Библийым финн-угор йылмылашке кусарыме историйым ончыкта, венгр, финн да эстон йылмылашке ончычсо кусарымаш-влак гыч тӱҥалын, таче кечын савыктен лукмо изданий-влак марте. Библийым кусарымаш нине калык-влакын литератур йылмыштым шуараш полшымылан, поснак кугу тӱткыш ойыралтын.
Выставкын ик тӱҥ темыже — XX курымышто финн-угор калык-влакын калыкле помыжалтмышт да кристиан тӱвыра деке кушкын толшо интересышт. 1983-шо ийыште Хельсинкиште негызлыме Библийым кусарыше институтын пашажлан кӧра лукмо савыктыш-влак ончыкталтыт.
Тачысе кечылан тичмаш Библий куд финн-угор йылме дене уло: финн, венгр, эстон, саам, удмурт да коми йылме дене. У Сугынь лу утла йылме дене савыкталтын.
Олык марий йылмыш У Сугыньым тӱрыснек кусарыме да 2007 ийыште печатлен лукмо. Тыгак Псалтирьым кусарыме да савыктыме.
Ончер вӱдшор тылзын 12-шо кечыж марте шуйна. Тудым финн-угор калык-влак кокласе кылым пеҥгыдемдаш да нунын тӱвыра поянлыкыштым аралаш полшышо событий семын аклаш лиеш.
Рушла Telegram-ыште лудса /
По-русски читайте в Telegram:
https://t.me/mariuver/386
MariUver
MariUver 