Пургыж тылзын 1-ше кечынже 12:00 шагатлан Нарва рӱдӧ книгагудышто «Финн-угор йылме-влакын куснылмышт» теме дене виш лекций лиеш. Тидын нерген тӱвыра тӧнеж Facebook мервотышто увертара.
2025 ий Эстон литератур ийлан увертаралтын, а 30-шо январьыште Эстон сылнымут кечым палемдат. Тиде финн-угор йылме-влакым ончал савырнаш сай амалым пуа.
Лекцийыште те финн-угор мутан акрет годсо угарман кумыж палыш-влак нерген, тыгак Сыктывкар олаште Ö йӱкпалылан шарныктыш нерген пален налыда. Тыгак мыланна палыме «Москва», «Волга» да «Ока» вер-шӧр лӱм-влакын вожышт саам, коми, мокша да эрзя йылмылаштат улмо нерген каласкален пуат.
Поснак кугу тӱткыш карел-финн «Калевала» эпосышто вашлиялтше Сампон тӱсакажым умылен налмашлан ойыралтеш. Лекцийым книгагудызо, сымыктышшанчызе да Mondial Art Academia-н чынле йыжъеҥже Елена Ховарт эртара.
Эртарыше-влак чыла кумылан-влакым финн-угор йылме-влак дене лишкырак палыме лияш ӱжыт.
По-русски читайте в Telegram >>
MariUver
тӧнеж – учреждений,
мервот – соцсеть,
угарман кумыж палыш-влак – новгородские берестяные грамоты,
йӱкпале – буква,
тӱсака – образ,
книгагудызо – библиотекарь,
сымыктышшанчызе – искусствовед,
чынле йыжъеҥже – действительный член
MariUver 