Эстонийын моло верлаштыже Рошто пайремым декабрьыште пайремлат гын, Сетумааште Кристосын шочмо кечыжым январьыште палемдат да тудым вес семын лӱмдат – Талси. Тартушто илыше калыкым 5 чатлама кастеным Ратуша кумдыкышто эртыше тиде пайремыш ушнаш ӱжыныт.
Пайремлыме жапым торжественно леэло муро, семӱзгар дене шоктымо дене да куштымо дене мучашленыт, тыгак Тарту Рошто изолан капкажым петыреныт.
Тарту воктенысе вершӧрла гыч толшо сету леэло-хорлам колышташ да ужаш йӧн лийын: Tsibihärbläseq, Liinatsurq, Ilolang, Kullakõsõ да молат. Выступлений-влак коклаште Ялмар Вабарна ойлен. Куштымо сем-влакым Nedsaja Küla Bänd шоктен, гармоньым Эстонийын эн сай гармоньчыжо Тоомас Вальк шергылтарен.
Талси пайрем Рошто изолалан мучашым пыштен, но Шупшалалтше студент-влак фонтан воктене верланыше каток кодеш. Ик тӱжем квадрат метр кумдыкан тиде изигумдыкышто гирлянде-влак йымалне 2-шо март йотке коньки дене мунчалташ лиеш. Каток кажне кечын 10 гыч 22 шагат марте пашам ышта, воза Tartu Postimees.
Пайрем гыч фотосӱрет-влакым Tartu Postimees газетыште ончыза.
MariUver
чатлама — январь,
кумдык — площадь,
изигумдык — площадка,
изола — городок
MariUver 