1 июнь гыч 31 август марте Марий Эл районлаште, Российысе марий-влакын тӱшкан илыме кундемлаште Марий калык погыныш делегат-влакым сайлаш тӱҥалыныт, увертара «Сурт-пече» газет.
XII Марий калык погын тений шыжым 31 октябрь-2 ноябрьыште лиеш. Съездлан ямдылалтме оргкомитетым Марий Эл правительстве председатель Юрий Зайцев вуйлата.
Марий мер каҥаш вуйлатыше, Оньыжа Эдуард Александровын увертарымыж почеш, 1 июнь гыч 31 август марте республикысе районлаште, Российысе марий-влакын тӱшкан илыме регионлаште делегат-влакым сайлаш тӱҥалыныт.
Погынлан ямдылалтмаште тидыже ик эн тӱҥ йодышлан шотлалтеш. Делегатым 1 100 еҥ деч иктым сайлат. 385 еҥ лийшаш.
Тыгак Мер каҥашын 45 еҥже, тергыше комиссийын 3 еҥже да, пытартыш Погынышто пунчалме почеш, кызыт марте Мер каҥашын мыняр вуйлатышыже лийын, нунат делегатыш пурат. Чылаже 438 делегат погына.
Сайлымаш рейтинг йӱклымаш гоч эртышаш. Эн шуко йӱкым погышо-влак сеҥышыш лектыт, воза 21-ше (1029) № «Сурт-пече» газет.
MariUver
Уведомление: Начались выборы делегатов | MariUver