Юбилейжым фестиваль дене палемда

Чатлама тылзын 23-шо кечынже Василий Пектеевлан 70 ий темын. М.Шкетан лӱмеш Марий кугыжаныш драме театрыште тудын лӱмгечыжлан пӧлеклалтше фестиваль тӱҥалтышым налеш.

Спектакль-влакым ончыктымаш пургыж тылзыште тӱҥалеш да кум тылзе шуйна. Чылаже В. Пектеевын пытартыш куд ийыште шындыме 12 постановкым ончыктат. Фестиваль кум тылзым шуйна.

Василий Александрович Пектеев (Санян Вачи) 1954 ийын чатлама тылзын 23-шо кечынже Марий Эл Морко район Уилем ялеш шочын. Марий серызе, почеламутчо, артист, режиссёр, мурызо, мер пашаеҥ, Марий Эл Республикысе тӱвыран сулло пашаеҥже (1995), Марий Эл Республикысе Иван Палантай лӱмеш кугыжаныш премийын лауреатше (1997), Йыван Кырла лӱмеш театр премийын лауреатше (1997), Мер каҥашын Оньыжаже (1992–2000). Кызыт М. Шкетан лӱмеш Марий кугыжаныш драме театрыште сылнешке вуйлатышылан пашам ышта.

Василий Пектеев Надежда Крупская лӱмеш Марий кугыжаныш туныктымаш институтышто кок курсым тунем пытарымеке, Ленинградысе театр, музык да кинематографий институтыш тунемаш куснен. 1980 ийыште пытарен.

Шкетан театрын режиссержылан, 1987 гыч тӱҥ режиссёржылан, 1992–2002 ийлаште сылнешке вуйлатышылан ыштен. Тӱрлӧ жанр дене 50 утла спектакльым шынден. Финн-угор театрын калык-влак кокласе «Майатул» фестивальым эртарыше-влак коклаште лийын. Мер каҥашын икымше оньыжажлан сайленыт. Тыгак, Василий Пектеев Театр сымыктышын Санкт-Петербургысо кугыжаныш академийын доцентше лийын (2001–2005 ийлаште). Пашажым кӱкшын аклен 1997 ийыште Кугыжаныш премий дене палемдалтын, воза «Википедий».

Йомдарыме 16 ий

Театр деч посна тудо 1992-2000 ийлаште Марий мер каҥаш вуйлатыше — Оньыжа лийын. Неле пагыт толын 2000-ше ийла тӱҥалтыште. Шке кундемжым, калыкшым, марий театрым йӧратыше айдемылан эн вийвал пагытыште 16 ий вес вере пашам ыштен кошташ логалын. Йолташ-влакат шукын тупынь савырненыт. Тиде татым Нина пелашыже нигузе умылен кертын огыл: кузе шочмо калыкшым йӧратыше айдеме вес вере пашам ыштен коштеш…

Но Пектеевмыт чыла тидым сеҥен лектыныт, да 2018 ийыште Василий Александровичым уэш театрыш ӱжыныт. Йӧратыме театрышкыже, ешара «Кугарня» газет.

В. Пектеев 40 утла спектакльым шынден.