Марий Эл радиолан 18 ий темын

Марий Эл радио шкенжын 18 ияш лӱмгечыжым сӱрем тылзын 22-шо кечынже кугу кеҥеж концерт дене палемден, воза «Марий Эл» газет.

Тудо «Дружба» стадионышто эртен. Кузерак сцене гыч йоҥгалте тушко 5 тӱжем наре еҥ толын. Сценыште шогышо радиовӱдышӧ, эстраде артист-влак дене пырля нуно муреныт, куштеныт, кумылыштым вӱчкеныт. Эшежым кум ий, тыгай концерт эртаралтын огыл, сандене тудо вучымак лийын.

А кузе калыкна Марий Эл радиом йӧрата, возашыжат огеш кӱл, очыни. Тудым мемнан республикыште веле огыл, Российын тӱрлӧ лукыштыжат, йот эллаштат, эсогыл Америкыште, Италийыште, Нидерландыште, Финляндийыште, Эстонийыште, Литваште да моло вереат колыштыт.

Шукыштын тудо суртыштышт йӱдшӧ-кечыже йоҥга, сандене лишыл йолташ семын радио эре пырля, манаш лиеш. А весыштлан, поснак йот элыште илыше-шамычлан, шочмо вер дене кылым кучаш, тушто мом лиймым пален налаш да тӱҥжӧ марий йылмым мондаш огыл полша.

18 ий жапыште Марий Эл радион кеҥежымсе концертше марий калыкнан ик эн йӧратыме йӱла пайремышкыже савырнен манашат лиеш. Чыланат ончылгоч билетым налын ямдылалтын толыт. Эсогыл тоям тоялен толшо илалше кувавайымат ужым. Тиде огыл мо йӧратымаш нерген ойла?

Эшежым радио пашаеҥ-влак нунылан шуко пӧлекым ямдыленыт ыле. Пӧлек шотеш спонсор, партнёр-влакын полшымышт дене кондиционерым, турпутёвкылан, массажлан сертификат-влакым, тӱрлӧ кочкыш сату йӧрварым монь кучыктеныт. Эсогыл велосипед дене мӧҥгыш кайышат лийын. Тудым Морко район Шиньшаште шочын-кушшо, кызыт Озаҥыште илыше Валентина Степанова модын налын. Вучыдымо пӧлеклан тудо моткоч куанен ыле. «Эргымлан пӧлек лиеш», мане.

Ныл шагаташ концерт-шоун программыжат поян лийын. Марий Эл радиошто идалык мучко йоҥгалтше муро-влакым колыштмо. Южо номерже-влак чылт хитыш савырненыт, манаш лиеш. Налаш Сергей Пакеевын «Студент» мурыжымак. Кеч ты артистым гармоньжо деч посна сценыште ужмат огылла чучеш.

МЭТР ТВ-ын видеокаласкалымашыжым ончыза:

Ончыч радиовӱдышылан ыштыше, а кызыт Таджикистаныште контракт почеш службым эртыше да отпускыш толшо Вадим Протасовын сценыште гитарым шоктен мурымыжым колышташ куанле лийын.

Мурызо Мая Адметзяновамат палемдыман, радиовӱдышо-влакын ойлымышт почеш, тений гына 30 наре мурым намиен. Иктыжым сцене гыч йоҥгалтарыш. «Южгунам муралтыме шуэш, южгунам кушталтыме шуэш» манме шомакшым ончышо-влакат пырля муреныт. Аделина Батаева «Йӱштӧ вӱдым йӱмем шуэш, помидор кочмем годым» калык мурылан у шӱлышым пуэн, у семын йоҥгалтарыш.

Шукерте огыл илыш гыч кайыше мурызо да радиовӱдышӧ Раиса Данилован «Илаш кӱлеш» мурыжымат колна. Тудлан у шӱлышым Светлана Яндукова пуэн.

Шернур кундем гыч Саша Иванов кум иза-шольо Шабдаровмыт дене пырля сценыште выступатлышт. Эрге-влакын кушкын толмыштлан, усталыкыштым пойдарымылан куанаш гына кодеш. Теве гына изи улыт ыле, качымарийышкат савырненыт.

Концертыште шуко мотор дуэт-влак мурым мурышт. Евгений Иванов ден Виктория Мочаловам гын онченак куанышым. Южо лӱмлӧ мурызыжын у мурыжымат колмо шуэш ыле, конешне. Но калыкын йӧратыме мурышкыжо савырныше сем-влак садак кумылым налыт.

Икманаш, Марий Эл радион пашаеҥже-влак ончаш толшо калыклан куаным кондышо кугу пайремым пӧлеклен кертыч. Иктым гына вес ганалан шотыш налман, очыни. Концертыш билетым верым ончыктыманымак ужалыман. Уке гын южышт ончылгоч ик радам дене верым айлен шинчыт, а весышт верым кычал коштыт. Пайремыш толмо гын, шкем пагалыман, воза Светлана Носова «Марий Эл» газетыште.

Марий Эл радион концертше гыч фото-влак: