Пеледыш тылзын 1-ше кечынже Самырык тукым полатыште Йоча-влакым аралыме тӱнямбал кечылан пӧлеклалтше «Йоча тӱня» республик кӱкшытан пайрем эртен. Тушко сайын тунемше, тӱрлӧ конкурслаште шкеныштым устан ончыктышо ӱдыр-рвезе-влак погыненыт.
Уна-шамычым Агытан, Тарля, Смурфик-влак «Весела модыш аланыште» вашлийыныт. Йоча-влакым кок оҥгырыш шогалтен, марий сем почеш тавыктеныт, мурыктеныт, писылыкыштым, чолгалыкыштым тергеныт. Тыгак пайремым локтылаш шонышо осал Гармагель ваштареш «кучедалыныт». Юарлымашке Кеҥежат ушнен.
Икшыве-влакым саламлаш Тӱвыра печать да калык-влакын пашашт шотышто министрын алмаштышыже Галина Ширяева, Марий Кугыжаныш Погынын депутатше Лариса Яковлева, Марий Тӱвыра рӱдер вуйлатыше Наталья Пушкина толыныт. Концертым марий эстраде шӱдыр-влак дене пырля, мурышо да куштышо йоча ансамбль, ончыкылык чолга артист-влак сӧрастареныт.
«Шовыроҥ» шоуат йоча-влаклан пеш келшен. Шовыроҥ-влакше мастарын кидыштыже могай-гына лийын огыт керт? Изиат, кугуат, кужуат, пудештылдымат… Тудын кӧргышкыжӧ йочат пурен кертеш улмаш.
Толшо-влакым «Мый улам Марий Элын йочаже» фото ончерат куандарен. Мучашлан кажныжым лумэгерче дене сийленыт, воза «Марий Эл» жаплышташ.
Марий Эл КТРК-ан видеорепортажше:
Видео гыч скриншот-влак:
MariUver
MariUver 