Эстонийын рӱдолажын Туныктышо-влак пӧртыштыжӧ — Õpetajate maja кылме тылзын 7-ше кечынже Марий Эллан 100 да эстон-марий вашкыллан 30 ий теммым пайремленыт. Тыгак марий талешкына-влакымат шарналтеныт.
Мероприятий Марий автономийын 100 ияш лӱмгечыжлан да ушем кӱкшытыштӧ эстон-марий сотрудничествылан 30 ий теммылан пӧлеклалтын. Шошым коронавируслан кӧра Талешке кечым палемдаш йӧн лийын огыл да, марий геройна-влакымат уштеныт.
Пайремыште кок марий организацийын, Фенно-Угрийын, моло калыкле ушемын еҥышт-влак лийыныт. Тыгак Эстонийыште калык-влак кокласе кыл да фольклор сомылым шуктен шогышо тӧра-влакат ӱжмӧ почеш толыныт.
Кас кум ужаш гыч шоген да тудым Жанна Тохт ден Давид Рябчиков вӱденыт. Тӱҥалтыш Марий Эл Республикын 100 ийым темымыж нерген ойлен. Марий Инга Погонина ден япон ӱдыр Сакико Ишии кӱсле дене шоктеныт.
Анна Макеева (Мишина) ден И.Погонина «Юмо аралыже шочмо элнам» чапмурым муралтен пуэныт.
Вара марий талешкына-влак лӱмеш шарнымаш сортам чӱктеныт.
Кумшо ужаш Эстон-марий ушемым ыштымылан 30 ий теммылан пӧлеклалтын. Тиде организацийлан негызым пыштымаште эн чот курык марий Валерий Аликов тыршен. Тидын нерген Йаак Прозес ойлен. 1990-ше ийлаште марий да эстон калык коклаште кыл кугыжаныш кӱкшытыштат пеш пеҥгыде лийын. Тидым кокымшо Эстон президент Арнольд Рӱӱтельын ватыж дене пырля серыш семын колтымо да тунамсе Марий Эл туныктыш министр Римма Катаеван видео йӧн дене саламлымашышыштат пеҥгыдемдышт. Римма Григорьевна дене пырля ончычсо Оньыжа да Марий ушем вуйлатыше Владимир Козловат пайрем кумалаҥдымашым ойлен.
Марий-влакым саламлаш Эстон тӱвыра министерствын еҥже Анне-Ли Реймаа, Эстон кугыжаныш погынышто — Riigikogu Финн-угор калык-влаклан полшышо тӱшкам вуйлатыше Райво Тамм, Эстонийысе изи калык-влак ассоциацийым вуйлатыше Наталия Ермакова, Фенно-Угрий директор Кади Раудалайнен толыныт ыле.
1999 ийыште Эстон-марий ушемлан Марий землячестве лӱмым пуэныт. Тудым Виталий Рыбаков вуйлатен. Тидын нерген Виталий шкежак ойлен пуэн.
А.Макеева, И.Погонина да В.Рыбаков марий такмак-влакым шергылтареныт.
Таллинн марий ушемын (ТМУ) ансамбльжат муралтен-кушталтен.
Да Алексей Алексеевын «Кӱдыроҥгыр» мурыжым мурен.
Таллинн марий ушемым вуйлатыше Людмила Ямурзина организацийышт нерген видеопрезентацийым ончыктен да таче кечысе илышыж нерген каласкален.
А.Алексеев верысе йоча-влакын Марий Элым саламлымыштым видеош войзен да келыштарен.
Наталья Лилль марий вургем ончерым ямдылен. Тыгак тудо марий тӱран тӱрлӧ нӓстӓм да коронавирус деч маске-влакым ыштен конден.
Пайрем газет
Лӱмгече вашеш Mari leht (Марий газет) ТМУ инфо-бюллетеньым луктын. Жаплышташыште Васли Николаев Марий автономий областьлан негызым пыштыме да молан Сталин репрессий годым марий-влакым тынаре шуко пытарыме нерген эстонла воза.
Таллинн марий ушемым вуйлатыше Людмила Ямурзина эстонийысе марий организаций-влакын кузе шочмышт да вашталт толмышт нерген каласкала.
Йаак Прозес эстон-марий вашкыллан пӧлеклалтше статьям эстонла серен.
1991 ийыште Эстонийыш тунемаш толшо икымше ныл студент гыч иктыже Юлия Куприна лийын. Тудо шке шарнымашыжым курык марла темла.
Пайрем сценарийым И.Погонина, Ж.Тохт, Н.Лилль да Л.Ямурзина возеныт. Касым Таллинн марий ушем ямдылен да эртарен колтен.
Мероприятий гыч фотосӱрет-влак:
Моло фото да видеом ТМУ Facebook тӱшкаштыже ончыза >>
MariUver
Материалым Анна Макеева, Жанна Тохт да Елена Ткаченко пуэныт,
ик тӱшка фото ТМУ Facebook группыж гыч
MariUver 
Уведомление: Марийцы Таллинна отметили три памятные даты | MariUver
Поро!
Мокталтыде ок лий. Патыр улыда.
Ик йодмаш: «Ару Элнет» тоштерлан кӧ ик-кок «Марий газет»-ым муын кертеш?
Поро!
Кугу тау Васли Николаевлан — газетым колтымыжлан. Тудо тоштерын чондайыштыже аралалташ да калыклан ончыкталташ тӱҥалеш.
Тау.
Уведомление: Задорные марийские частушки | MariUver