Але кузе профессор Сануков «Марий ушемлан» пеҥгыдын ӱшанен
2020 ий 14 октябрь марий шанче тӱняште адак ик ойган кече семын палдырнен кодо: мемнан деч пагалыме шанчыеҥна, профессор Ксенофонт Никанорович Сануков (1935-2020) каен колтыш. Уке лие адак ик поро, ушан, ончык ужын да илышлан акым пуэн моштышо марий Айдеме.
К.Н.Сануков дене «Марий ушем» мер организацийын пӱрымашыже ойыраш лийдымын да чак кылдалтын. Эше 1989 ийыште, «Марий ушемын» угыч ылыжаш тӱҥалме пагытыштыже, «Мемориал» обществым вуйлатымыж годым Ксенофонт Никанорович у тӱсан марий мер организацийлан йол ӱмбак шогалаш аклаш лийдымын кугун полшен. Варажымат – чырык курым утла – эреак «Марий ушемын» поро йолташыже, чактараш лийдыме еҥже лийын кодын. Тыге ӱмыр мучаш марте.
Сандене пытартыш кечыже марте профессор да «Марий ушем» кокласе кылна нигунам кӱрылтын огыл. Эсогыл неле, тазалык начар годымжат тудо менан меропрятийлашкына черым сеҥенак толын лектеден да поро шомак, кӱлешан ой дене кумылнам нӧлтен.
Ик тыгай кугу вашлиймашыже 2016 ий 26 мартыште ыле. Тунам ме «Марий калыкын теҥгечысе кечыже, тачысе илышыже да ончыкылыкшо» лӱман кугу форумым эртарышна. Тушко 130 наре чолга марий погынен, ятыр пӱсӧ йодышым тарватен, каҥашен, эсогыл ӱчашен. Пагален ӱжмына почеш Ксенофонт Никанорович толын, докладым ыштен.
Таче, профессорна К.Н.Сануковын нылле кечыже вашеш, тудын ныл ий ончыч ойлымыжым ончал колышташ темлена (40-ше мин. гыч)
Тек профессорна нерен поро шарымашна кужу-кужу жаплан чонеш кодеш. Тудын мландывалне тыршымашыже тачысе марий-влаклан илыш-кылым ӱшанлын шуйдарымаште вий-куатым пуа.
Тыгак темлена 2020 ий 3 февральыште Рамай Юлдашын ыштыме съёмкыжым:
«Марий ушемын» темлымыже почеш
Лайд Шемйэр
Видеом автор ыштен
MariUver 