Марий Эл Кужэҥер район Визымйыр воктене «Муро памаш» фестивальым тений икымше гана регион кокласе кӱкшытыштӧ эртареныт. Да икымше гана пайремыш йот эл — Эстоний — гыч уна-влак толыныт, увертара Марий Эл КТРК.
Тиде калык усталык, кидпаша да сем пайремын программыже поян лийын. Фестивальым эртарыше-влакын ойышт почеш пайремыш 34 коллектив толын. Тиде республикын ятыр районжо гыч ансамбль-влак, Татарстан Балтач район гыч «У ял» коллектив, Чуваший гыч уна-влак лийыныт.
Тыгак фестивальыш Эстоний гыч участник-влак толыныт. Сӱрем тылзын 18 кечыж гыч тӱҥалын 21 кечыже марте Эстонийын Выру олаштыже Калык куштымаш фестиваль эртен. Тушто Марий Эл гыч «Мурсескем» калык фольклор ансамбльат участвоватлен. Нуным тушко эстон-влак ӱжыныт.
Ынде марий-влак Эстоний гыч Тару университетын калык куштымаш да мурымаш ансамбльжым ӱжыныт, ойла «Мурсескемым» вуйлатыше Евгений Каменщиков.
«Муро памаш» фестиваль нерген видосюжетым уверын 10:03 гыч ончыза:
Ушештарена, родо-тукым эл гыч коллектив кодшо шуматкечын Йошкар-Олан кечыштыже шке мастарлыкшым ончыктеныт. Тыгак нуно Марий Элын моло верлаж денат палыме лийыт.
Марий Эл КТРК-ан материалже негызеш
MariUver
MariUver 