Шочмо верыш пӧртылаш жап шуын

CerkysolaМогай финанс план дене Россий Федераций 2016 ийыште илаш тӱҥалеш? Тиде йодышлан вашмутым шуко еҥ кычалын мо?

Федерал канал дене черетан идалык бюджет нерген икмыняр арня ончыч изишак кутырышт. Россий Минфинын шотлен лукмыжо почеш кугыжаныш казнаш латкум триллион утла теҥге пурышаш, а илен лекташ латкуд триллион утла кӱлеш. Тидын годым нунын шонымышт почеш нефть баррель витле доллар деч шергырак шогышаш. А мом ме таче ужына: нефть кумло доллар якте волен.

Кушко вара кугыжаныш латкуд триллион утла теҥгем «чыкынеже»?!  Мутат уке, Сирийыште сарым вӱдаш! Да Сирийыште гына огыл… Война сомыллан бюджет гыч кугу ужашым ойыреныт. «Мемнам йырваш тушман-влак авыреныт!»

Кугыжанышын шке армийже лийшаш, тидын дене нигӧ огеш ӱчаше. Но кунам «йоча оксам» огыт тӱлӧ, кунам пачерлан тӱлаш нимо гыч, кунам калыкын кочкаш налаш оксаже огеш сите… Кӧм тиде армийже аралаш тӱҥалеш?! Шуко еҥже Российыште пенсий марте илен огеш шу. Поснак ялыште шучко сӱрет… Пашадыме да мыскылалтше ялысе калык йӱэш, ончыкылык нерген шонаш ӧреш…

Тений адак сайлымаш идалык. Шыжым Кугыжаныш Думыш депутат-влакым ойыраш тӱҥалына. Шукыштлан кызытак раш, партий-влак чылан «ик капкаш модыт». Калыкым аҥыртарен, ваш-ваш ӱчашыктен «кӱтӱчӧ-влак» ончыко вӱдат. Кугыжанышын шке парламентше лийшаш. Садлан сайлымашым кӱлешан пашалан шотлыман. Партий-влакыште лийман, партий-влак гоч шке шонымашым шыҥдарыман. Икманаш нуно гына огыл, нунымат кучылтман. Тидын годымак пеҥгыде шонымашан айдеме кодман. Шке шочмо кундемым, шочмо пӱртӱсым, шочмо калыкым йӧратыше еҥ лияш тыршыман.

Кокытеланымаш шочеш, пуйто кугыжаныш шке калыкше нерген огеш шоно, пуйто кугыжаныш шке калыкшым огеш акле. Незер калыклан тыгай ситуацийыште мом ыштыман? Каласаш неле. Тыгодым эн ондак шкемым «кидыште кучыман». Йӱмӧ койышым ӧрдыжыш шӱкалман, кап-кылым, чон-ушакылым пеҥгыдемдыман, паша уке гынат, пашам ыштыман. Поснак ялыште паша эре лектеш. Пачерым айлен илаш йӧн уке гын, олам коден шочмо верыш пӧртылаш жап шуын.

Алексей Андреев

Фотосӱретым «Марий Эл» газет гыч налме

5 комментариев

Filed under Артикль-влак

5 responses to “Шочмо верыш пӧртылаш жап шуын

  1. изерге

    «Ялыш портылаш жап толын шуын».А ялыште мом ышташ туналеш рвезе калык? Паша уке.Шке семын нолталаш?Ял озанлыкым нолталаш шуко окса кулеш:техникылан,семеналан,полемым чонаш….Налоговик -влак тыйын вий погыметым ончаш огыт тунал,эрлашыжымак «пунетым » кураш туналыт.Калык кызыт весе улыт,особенно молодежь.Нунылан изи огыл зарплате манмет кулеш,а изи оксалан только йуаш йоратыше веле каят.
    Тыште ушан политика манмет кулеш.А пока власть олигарх кидыште( калык поянлыкым ондален шке кидышкышт руалтен налше-влак),воктенышт криминал элемент-влак…,Ял озанлыкым изи фермер-влак шкаланышт илен лекташ веле нолташ толашат.Кулеш НЭП.
    А Госдума депутатыш властный структура,але административный ресурс манмет дене «Единая Россия»шке енжым шукаш туналеш.А мо тугай «Единая Россия?»Тиде адакат олигарх-влакын партийышт: Ко таче моктана: «Ме — партия власти».А ялысе единорос-влаклан изишак оксам тучалтат,и нуно ямде улыт уло ялсовет олмеш йуклаш….шке.
    А ялым,ялысе илышым нолталман.И депутатлан сайлыман .Марийым.

  2. Уна

    Ом пале кузе вес регионышто, Марий Элыште КПРФ верч йӱклыман. Яллаште теве адак лӱдыктыл-ондален «единосос-влак» верч йӱклыкташ тӱҥалыт.

  3. шырган

    жапше шуын да,но шуко чолга мармйже тыгерак шонат дыр

    Оҥ ден ом тöрштö амбразурыш —
    Молан орадым аралаш?
    Погалын тудын ушым урзыш
    Мöҥгеш огеш лий опталаш

    Келша тудлан окмак уш дене
    Койдарымылан куанаш.
    Ок лек гынат эрдене кече
    Ок му амалым ойгыраш.

    Ойлет тудлан улат пычкемыш,
    Шылтен шинчажым кораҥеш.
    Арва ден тудын вуйжым темышт,
    Йомдарыш чонжым поранеш.

    Шуктен тыгай ик тукым кушкын
    Теҥгечым орлышо шӱман.
    Йӱд-кече кӧ шеҥгеке нушмым
    Шотла эрлаш ошкылмылан.

    Садлан ом тöрштö амбразурыш
    Ораде-влакым аралаш.
    Ом пого шинчавӱдым урзыш,
    Ом шоно тудым аралаш.

  4. Аноним

    Кузе кугыжаныш бюджетын дефицитшым иземдаш тӱҥалеш? Адак чыла просто калык гоч илен лекнешт?!

  5. Аноним

    мый умырем мучко илем ялыште да орам марий калык верч молан ме ужалатше калыкыш савырнен улына марий калык шке коклаштыт ваштареш шогалыт мылам намыс

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s