Самырык шанчызе-влаклан финн-угор ушем-влак нерген ойленыт

Пургыж тылзын 3-шо кечынже Тартушто Финн-угор теле школыш толшо студент да самырык шанчызе-влакым Эстонийыште улшо финн-угор мер ушем-влак дене палдареныт.

Касым Васли Николаев почын. Мероприятийын шонымашыже эн ончыч Тартушто улшо финн-угор организаций-влак дене палдарымаш лийын. Да ушемышт нерген членышт-влак шке толын ойлышаш улыт ыле, ман каласен тудо.

В.Николаев тӱҥалтышыште Эстонийыште улшо парышдыме ушем-влак радам да финн-угор ушем-влак нерген кӱчыкын каласен. Вара кумданрак «Тарту марий-влак ушем» дене палдарен. Тудо эстонла ойлен да англичанла презентацийым ончыктен.

Вара Тартушто улшо одо «Юмшан гур» ансамбль дене Инга Игнатьева ойлен пуен. Инга удмуртла ойлен да Симонас Норейкис англичан йылмыш кусарен. Каласыман, колыштшо-влак коклаште одо йылмым палыше вес еҥ-влакат лийыныт.

Финн-угор теле школын тений тӱҥ темыже — коми йылме, садлан школым эртарыше-влак касыште коми темат лиеш гын, сай лиеш манын ойленыт ыле. Тартушто коми ушем уке, Таллинныште веле. Но рӱдолаште ту кечынак Фенно-Угрийыште коми кас эртен, садлан Коми тӱвыра ушемым вуйлатыше Наталья Ганова толын кертын огыл. Но тудо касыш коми-эстон еш гыч улшо Катрин Саагем ӱжаш темлен. Самырык ӱдырамаш Тартушто ила гынат, коми йылмымат пала. Катрин англичанла шкеж, ешыж, Коми мландыште илыше родышт-влак нерген пеш сайын, оҥайын да мыскара йӧре ойлен пуен.

Мучашлан МАФУН президент Суви Кяби финн-угор самырыктукым ассоциаций дене палдарен. «Фенно-Угрийын самырыкышт-влак» шке ушемышт нерген да Комиш FUROR-ыш коштмышт нерген каласкаленыт.

Ойлымо коклаште Анна Мишина шкетын урал марий тошто мурым муралтен. Вара А.Мишина ден Елена Ласточкина эше Татарстан кундем марий-влакын «Пӱтыральым — рончалте» мурыжым шергылтареныт.

Тыгак мучаште чылаштым Анна марий такмак сем-влак почеш марла кушташ туныктен.

Мероприятийыш толшо-влак марий книга-влакым, CD-ым оксала налын кертыныт. Тарту марий организацийын пӧлемжым ужаш йӧн лийын. Мучашлан чылаштлан чайым да кофем йӱаш яра темлыме.

Финн-угор касым «Тарту марий-влак ушем» эртарен. Тау Джереми Брэдлилан англичанла презентациемым тергымыжлан.