Культур рӱдола Кайык Обиницаште
Шорыкйол тылзын 7 кечынже Обиница ял «2015 ийысе финн-угор тӱвыра рӱдола» лӱм дене чеверласа. Тыгак тушто родо-тукым ял-влакын форумышт эрта.
Финн-угор культур рӱдола улмым пайремлын мучашлымаш Сетумаан Обиница ялжын тӱвыра да спорт рӱдерыштыже 15 шагат да 30 минутлан тӱҥалеш.
Рӱдолан символжым, пу гыч ыштыме Кайыкым, венгр-влаклан кучыктат. МАФУН конгрессын пунчалже почеш тений, 2016 ийыште, «Финн-угор культур рӱдола» лӱмым Венгрийыште Искасентдьöрдь (Iszkaszentgyörgy) ял ден Веспрем (Veszprém) ола нумалаш тӱҥалыт.
8-9 январьыште «Сету тӱвыра фонд» Обиницаштак Финн-угор ял-влакын форумыштым эртара. «Ял — илыш вийым пуен шогышо том» форум финн-угор ял таче кузе ила манын каҥашаш, тӱрлӧ ял-влак коклаште кылым ышташ, Российыште улшо финн-угор ял-влаклан Эстонийыште таҥлалтше ялым муаш полшаш ман чумырга.
Тыгак кузе яллаште финн-угор калык-влакын тӱвыраштым, йӱлаштым арален кодаш, да тиде поянлыкым кучылтын амалкалымаш кӱкшытыш луктын, ял калыклан илен лекташ манын, ойлаш тӱҥалыт. Форумышто этнотуризм йодышымат нӧлталыт.
Мероприятийыш Пермь, Санкт-Петербург да Моско олала, Удмуртий, Марий Эл, Карелий республикыла гыч толшаш улыт.
Икымше кечын доклад-влак йоҥгаш тӱҥалыт. Кокымшо кечын икымше пелынже сету ял-влак мучко экскурсий вуча. Вара адак доклад-влакым лудаш тӱҥалыт. Кок кечынжат кастеным форумыш погынышо-влакым культур программе куандара.
Тыге Сету кундемын Обиница ялже тӱвыра рӱдола лиймыжым иктешла гынат, финн-угор сомылым умбакыжат шуяш шона.
MariUver
MariUver 