Т.Албахтина марий-влак нерген каласкала
Тарту кристиан тӱҥ школышто да Эстон калык музейыште марий-влак дене палдареныт.
16 октябрьыште Тарту кристиан школышто руш йылмым туныктышо Татьяна Албахтина Родо-тукым кече-влак кышкарыште калыкна нерген ойлен пуен.
«Тыгак 9 классыште тунемше-влак марий-влак нерген плакатым ыштеныт да мемнан юмын йӱлана нерген каласкаленыт. Вара 7, 8 да 9 классыште тунемше ӱдыр-рвезе-влак дене подкогыльым ышташ тунемынна. Пеш келшыш, поснак тудым «тӱрлымаш». Вара шолтенна. Ончем, ик рвезе ок коч. Йодым, молан ок коч. «Мый нуным кочкаш ом тошт», — манеш. Мый кочкын ончал, ала келша маньым. Вара ончем, уже чылан каен пытен, а тудо шкет кодын ӱстел коклаште. Ну, йӧра, шонем, тугеже келшыш», — каласкала Т.Албахтина.
Таче, 17 октябрьыште, Тарту марий рушарня школыш коштшо йоча-влак, туныктышо-влак дене пырля, Эстон калык тоштерыш коштыныт. Тушто финн-угор калык-влаклан пӧлеклалтше еш кече эртен. Лиза Салмиянова флейте дене «Чеверынат-чеверын» мурын семжым шокталтен пуен. Вара тунемше ден туныктышо-влак пырля тошто марий куштымашым ончыктеныт. Умбакыже мастар-классыште хант курчакым ышташ тунемыныт.
Вот тыгерак Тартушто илыше марий-влак Эстонийыште эртыше родо-тукым кечыла годым верысе калыкым марий-влак дене палдарат.
Марий рушарня школ туныктышо
Татьяна Албахтинан уверже негызеш
MariUver
Фото: Т.Албахтина
MariUver 
Пайрем кече-влак дене, эстон- марий калыкем! Пашада ушныжо!
Рат дене возгалыме инфода пеш ку»лешан . молымат тарата кыртмен шке шинчымашыжым, пашам ыштен моштымыжым ончыкташ изилан-кугуланат.
Мари еНын поро лу»мжым ку»шке но»лтеда. Тау.