Марий А.Мишина да одо Н.Анисимов
Эстонийын рӱдолаштыже 19 да 20 сентябрьыште Этноярмиҥга эртен, тушто марий семат йоҥген.
Тыгай мероприятийым Эстонийын изи калык-влак ассоциацийже кажне ийын эртара. Марий-влак тушто ынде кумышо ий участвоватлат.
Кок кече мучко Таллиннын рӱдӧ верыштыже, Ратуше кумдыкышто, эр гыч кас марте ярмиҥга эрта. Тушто ассоциацийыш пурышо тӱрлӧ калыкын ушемжылан ӱстелым пуат. Да кажне мер организаций шке калыкше дене палдара але кидпашам, калыкле кочкышым ужала. Тыгак площадьыште поген шогалтыме сценыште концерт эрта.
Тений ӱстел воктен шогаш ни «Тарту марий-влак ушемын», ни «Таллинн марий ушемын» йӧнышт лийын огыл. Но рушарнян концертыште Тарту марий-влак лӱм дене организацийын чолгаеҥже Анна Мишина 15 минут выступатлен. Тудо ныл марий мурым муралтен пуен.
Ярмиҥгаште тыгак родо финн-угор калыкна-влакын еҥышт лийыныт. Тарту гыч одо «Юмшан гур» ансамбль 45 минуташ концертым пуен. Тыгак эрзя да мокша-влак лийыныт да молат.
Рушарнянак йӱлаш пурышо Эстоний калык-влакын форумышт эртен. Тушто ассоциацийым вуйлатышылан суас Тимур Сейфулленымак коденыт.
Тыгерак черетан этноярмиҥга эртен каен.
Этноярмиҥга гыч фотосӱрет-влакым темлена:
MariUver
Фото-влакым Анна Мишина ыштен да Facebook гыч налме
