Марий мутерым калык окса дене лукмо

И.Г.Иванов

2015 ий 15 майыште кумдан палыме профессор Иван Григорьевич Ивановын шочмыжлан (15.05.1935 – 12.02.2012) 80 ияш лӱмгечыжым палемдыме. Тудым шарнен, профессорын савыкталтде кодшо «Марий йылмыште шуэн вашлиялтше мут-влак» лÿман мутержым лукташ пижме. Мутерым савыкташ финанс могырым полшымо амал дене Мер Каҥашын вуйверже марий калык деке «Поро кумыл» ӱжмаш дене лектын.

Тыге оксам 55 еҥ пӧлеклен. Мутерын 400-ше лаштыкыштыже оксам пӧлеклыше еҥ-влакын лӱмерышт уло.

Чылаже 35 250 теҥгем погымо. Тышеч книгам лукмо дене кылдалтше тӱрлӧ роскотым петырыме.

26 экземпляр гыч 10 книгам Иван Григорьевич Ивановын ешыжлан гонорар олмеш пуымо; ик книга гыч Янош Пустаилан (Венгрий), Р.А. Кудрявцевалан, В.Б. Голубевлан, Н.М. Красновалан, М.Н. Кузнецовалан, Л.А. Садовиналан, В.А. Федосеевлан, Г.С. Ширяевалан, Е.М. Андриановалан, С.С. Сибатровалан пӧлек семын пуымо. Нуно 500 да 500 теҥге деч утларак оксам мутерым лукмашке пыштеныт.

Ик книгам Марий книга савыктышлан кодымо; профессор И.Г. Ивановын йот элыште илыше йолташ ден коллегыже-влаклан (Эстоний, Финляндий, Германий) 5 экземплярым колтымо, воза Маргарита Кузнецова «Арслан» интернет-журналыште.

Налмывер: Арслан