Шарнымаш сорта, 2009 ий
«Марий ушемын» вуйверже 2015 ий 10 мартысе погынымаштыже ныл йодышым ончен лекте. Нунын кокла гыч тӱҥ верым марий йӱла дене кылдалтше пайрем-влакым эртарымаште «Марий ушем» могайрак надырым пышта, мом эртараш кӱлеш манме йодыш эн ончылно шоген.
Тӱрлӧ сомылжат ятырак. Но йӱла пайремлан поснак кугу тӱткыш ойыралтшаш манын палемденыт вуйверын еҥже-влак.
Санденак, чыла могырым каҥашен налмеке, тыгай пунчалым лукмо:
1. 2015 ий 10 апрельыште, кугарня кечын, Оршанка районысо Марий Ернур воктен верланыше Мамич Бердей чоҥгашке вуй саваш каяш. Тиде ынде икмыняр гана эртаралтеш. Молан лачак апрель тӱҥалтыште тушко тарванымынан амалже тыгайрак: 26 апрельыште «Марий ушемын» еҥже-влак чыла вере огыт шукто, а Талешке-влакын радамышт кушкеш да кушкеш. Провой велке Пашканлан, Малмыж кундемыш Полтыш онлан вуй саваш да «Полтыш курыкым» тӱзаташ кудалышт савырнаш, Онар кундемышкат миен шуаш кӱлеш. А «Марий ушемын» ты кечын йӱлаш пурышо кугу сомылжо – Йошкар-Олаште «Шарнымаш пушеҥге» воктене «Марий Талешке кечым» эртарыме тургым.
2. 20–25 апрель пагытыште Малмыж кундемыш «Полтыш курык» историй-этнографий комплексым ыштымашке миен толына, тидлан машинам муаш да кумылан-влак тӱшкам погалтеш;
3. 26 апрельыште Сеҥымашын XXX идалыкше лӱмеш каныме паркыште «Шарнымаш пушеҥге» воктене «Марий Талешке кече» кугу мероприятийым эртараш. Тудо 14.30 шагатлан тӱҥалеш;
4. 2015 ий 31 майыште «Марий ушем» «Тумер отышто» Агавайремым эртара. 10.00 шагатлан тӱҥалеш. Самырык-влак тышке коштыт. Кугыеҥ-влак деке йодмаш: пелен икшывыда-влакымат налаш ида аптыране, вет тиде мланде иланыме пагыт, юарлыме пагыт. Сандене нунылан тушто йомартле лиеш. Тений лӱҥгалтышым пижыкташ, пикш йоҥежым кондаш сӧрат. Кӱсле шотыштат тыршен ончена.
Налмывер: Марий ушем
MariUver 