Кузе Интернетыште марла чын возаш

Интервотышто марий йӱкпале да йоҥылыш деч посна возаш мо кӱлеш? Тидын нерген ойлен налына.

Мутат уке, марий йылмым сайын палыде моторын да йӧршын йоҥылыш деч посна возаш ок лий. Но туге гынат, тӱрлӧ техникле йӧным кучылтын возымаште ятыр ситыдымашым кораҥдаш лиеш.

Але марте марий газет, журналлаште тӱрлӧ шке ыштыме марий шрифтым кучылт возеныт да, чаманен каласыман, таче мартат тыгак возат. Тидлан лӱмын марий букван шрифт-влакым, нунылан келшыше полдышоҥа радамым компьютерышкыда шындыман. Но тыгай йӧн дене возымаш да тыге серымым лудмаш пеш йӧндымӧ улыт, нуно таче кече илышлан огыт келше, поснак Интернет аланыште.

Адак кызыт Windows-ын (XP гыч тӱҥалын) шке тӱҥ шрифтлаштыжат чыла марий йӱкпале уло. Садлан Windows-ышто марла возаш нимогай ешартыш шрифт-влак огыт кӱл. Лач Windows-ым шындыме годым шуко йылман, тыгак кириллице, поддержкым вераҥдаш веле кӱлын. Тыгай уке гын, ешарен шынден кертыда.

Но руш полдышоҥаште марий буква-влак уке улыт, нуным возаш компышкыда марий клавиатур радамым шындыман. Марий полдышоҥа радам — тиде изи ешартыш программе, кудым шындымеке те марий буква-влакымат возен кертыда. Мутлан «ӧ» йӱкпалым шындашлан AltGr + «о» темдалман. Марий полдышоҥа радамым тыште муда:
http://wiki.komikyv.ru/index.php/Марийская_раскладка_клавиатуры

Возымо годым южгунам шижде йоҥылышым ыштен колтет але рушлаже «опечатке» манына. Але лач кузе чын возаш от пале да йоҥылыш серет. Тыгай йоҥылыш-влакым тергаш тӱрлӧ йылмылан спеллер але спелл-чекер-влак улыт. Microsoft Office Word программыште, векат, шукында рушла возымо годым руш йылме спеллерым кучылтында. Марла возымо текстымат Libre Office программылаште марий спеллер дене тергаш лиеш. Libre Office — Microsoft Office гайрак, но яра шаралтше, программе пакет. Libre Office-ым тышеч шупшыл налын шынден кертыда:
http://ru.libreoffice.org/download/

Тудлан марий спелл-чекерым тышеч:
http://komikyv.ru/tag/спеллер/

Вара эше сайтыш, блогыш текстым шындыме годым тидым шотыш налза. Кунам те иктаж текст редактор гыч, мутлан Word гыч, але Интервот гыч текстым копироватледа да вик шке сайтышкыда/блогышкыда шындеда, тунам Word-ышто, Интернетыште улшо текст шрифт-влак тендан сайтышкат куснат. Но кажне сайтын шаблоныштыжо тӱҥ текстлан ала-могай шке ик шрифт ойыралтын, да чыла текст тиде шрифт дене лийшаш. Тӱрлӧ шрифт дене возымаш мотор ок кой, адак лудашат неле. Садлан, тыгай ынже лий манын Word але Интервот гыч текстым копироватлен Windows-ын Блокнот (Notepad) программышкыже шындыман, тушто абзац-влакым тӧрлатен копироватлен шкендан сайтышкыда/блогышкыда шындыза. Тыге тендан лач текст веле кодеш, да сайтлан шаблоныштыжо тӱҥ текстлан ойырен налме шрифт дене текстым ончыкта.

Текстда тошто шке ыштыме марий шрифт-влак дене возалтын гын, тудым Джереми Брэдлин лӱмын ыштыме конвертерже дене таче кечыла келшыше Unicode кодировкыш кусарен кертыда. http://www.univie.ac.at/maridict/misc/marij-shrift.php

Текстдам копироватлен шолаш шындеда, да вара покшелне улшо умдым темдалыда. Пурлаште вашталтыме текст лиеш.

Тыгак кӱшнӧ возымо йодыш-влак дене кылдалтше материалым mari-language.com сайтыште марла да рушла муыда.

MariUver