«Турнявӧчыж, Регенче да молат»
Елена Юнусован «Турнявӧчыж, Регенче да молат» книгаже ош тӱням ужын. Тушко йоча-влаклан 11 тӱрлӧ сынан да койышан йомак пурен. Елена Юнусова Турнявӧчыжын, Регенчын, Модын, Коракигын, Ужаваигын да тудын аважын, молынат илышышт нерген утларак сымыстарышын каласкала. Книгам оҥай сӱрет дене Мария Клюкина сӧрастарен. Нине сӱрет-влакым йоча-влак, кузе шонат – туге, тӱрлӧ чия дене чиялтен кертыт. Тиде книга ӱдыр-рвезе-влакым йомак кугыжаныште коштыктымо деч посна, уш-акылыштым да кидыштым лывырташ полша. Книгам Марий Эл писатель ушем савыктен.
«Ковышта эрге»
Светлана Бессонован «Ковышта эрге» йомак-влак книгаже лектын. Тушко «Ковышта эрге», «Чачавий ден Унавий», «Юзо шер», «Осал виян тумо», «Актанай» йомак-влак рушла да марла пуреныт. Йоча-влак поро да осал герой-шамыч дене вашлийыт, Чачавийым чаманат, Вуверкуван койышыжым эскерат, тумын юзо вийжылан ӧрыт да моло илыш кыдежышкат логалыт. Сӱрет-влакым Светлана Тупицына келыштарен. Книга шуко чиян, чаткан келыштарыме. Книгам марий йылмым тунемме годым кучылташ кӱлешан. Книгам Марий Эл писатель ушем савыктен.
«Ош тамак»
Анатолий Новиковын «Ош тамак» романже савыкталтын. Тудо кок ужаш гыч шога. Роман марий калыкын кодшо курым годсо жапым авалта, тиде коллективизаций, колхоз, сар пагыт да моло неле саман. Илышыште поян лийме каргалтеш, нужналык кӱшкӧ нӧлталатеш, тыге кучедалмаш вияҥеш. Тушто чылажат ваш кылдалтын: йӧратымаш да ужмошудымаш, колымаш да пуштедымаш, чаманыдымаш да орланымаш, ондалкалымаш да чын верч кучедалмаш, да нимучашдыме чытымаш.
Книгам Марий Эл Республикысе Тӱвыра, печать да калык-влакын пашашт шотышто министерствын «Массовый информаций да книга лукмо пашам 2014–2020 ийлаште нӧлталын, вияҥден колтымаш» целевой программыж почеш Марий Эл писатель ушем савыктен.
Светлана Архипова
MariUver 
Поро паша, тау.