Марла-англичанла мутер ош тӱняш лектын

Марла-англичанла мутерТаче Вена университетыште савыкташ ямдылыме марла-англичанла мутерын презентацийже эртен. Мутер dict.mari-language.com вотлаштыкеш вераҥдыме, тудым интернет дене пайдаланыше кажне еҥ яра (оксам тӱлыде) кучылт кертеш.

Мутер чылаже 42 561 тӱҥ мутым, 82 742 мут кучылталтмаш ден примерым, ты шотыштак 10 749 фразеологизмым, уша. Тыге тудым Российысе финн-угор йылмыла гыч англичаныш кусарыме мутер кокла гыч эн кугулан шотлаш лиеш. Тылеч гоч, мо палена, кугыт дене мемнан савыктышна дене таҥастараш лийме Российысе иктаж-могай вес шагал еҥ чотан йылме гыч англичаныш кусарыме мутерат уке. Ойлыманат огыл, марий йылме дене пашам ышташ тӱҥалмына годым мемнан кид йымалне тыгай материал лиеш ыле гын, пеш куанена ыле.

Мутер Creative Commons лицензий дене савыкталтын. Лицензий семын пайдаланышын, автор-влакын лӱмыштым ончыктен, материалнам эрыкын шараш да кучылташ праваже уло. Мутер Австрий шанче фондын полышыж дене возалтын (P22786-G20 грант): проектна 2011-ше ий 1-ше шорыкйол тылзын тӱҥалын да кум ий шуйнен. Тудым Вена университетысе финн-угор шымлымаш пӧлкан пашаеҥже-влак Тимоти Ризе ден Джереми Брэдли (англичан йылме дене шочмо йылме семын кутырат) да Марий кугыжаныш университетын туныктышыжо марий йылмышанчызе Элина Гусева возеныт.

Мутернан тӱҥ цельже кызытсе марий литератур йылмым авалташ лийын. Савыктышым тӱҥ шотышто англичан дене шочмо йылме семын мутланыше марий йылме деке кумылан еҥ-влак ямдыленыт, садлан тушто кугурак тӱткыш марий йылме дене кутырышылан огыл, а англичан йылман лудшылан ойыралтын. Тыге гынат пашана марий калыкланат пайдале лиеш манын, ӱшанена. Шонена, мутернам марий йылмым тунемше йотэл студент-влак веле огыл, англичан йылмым тунемше марий студент-влакат кучылташ тӱҥалыт.

Мутер шуко ойыртемже дене – мутлан, тудым мӧҥгешла англичанла-марла мутер семын кучылташ лийме але марий материалым (урал але тӱнямбал фонетике алфавитан, УФА але ТФА) транцскрипций дене ончыктымо дене – поснак йылмызе-влаклан оҥай лиеш:

Йылме эре вашталт толеш, садлан лексикографын пашажым нигунам пытышылан шотлаш огеш лий. Ме мутерым мыняр тӱткын ышташ тыршенна гынат, жап эртыме семын ситыдымаш-влак садак кояш тӱҥалыт. Нуным лийме семын вашкерак тӧрлаташ манын, софтверышкына мӧҥгешла вашкыл функцийым пуртенна. Тыге пайдаланыше-влак савыктыш шотышто шке келшыдыме ойыштым, темлымашыштым мемнан деке колтен кертыт.

Кызытеш мутерна литератур йылмын олыкмарий вариантшым веле авалта. Лишыл ийлаште тушко курыкмарий материалым пурташ посна плагиным ямдылена. Тудо финн Коне Фондын окса полышыж дене эн вара гын 2017-ше ийыште савыкталтшаш.

Мутернан презентацийже Йошкар-Олаште кеҥежымсе марий йылме школ кышкарыште эртен. Школышто моло дене пырля Вена гыч Джереми Брэдли да тудын студентше-влак лийыныт. Кеҥежымсе курсышто тунемше-влак марла-англичанла мутер дене кызытак пеш пайдаланат.

РЕГИОН 12-ын сӱреткаласкалымашыж-влак (видеосюжетше):

Джереми Брэдли,
2014-ше ий 25-шe сӱрем,
Йошкар-Ола, Россий

4 комментария

Filed under Видео, Увер-влак

4 responses to “Марла-англичанла мутер ош тӱняш лектын

  1. семён

    Шонем, тиде словарь деч простой марийлан пайдаже практически йок.

  2. Пиш яжо пӓшӓ. Мары халыкна дӓ йӹлмӹнӓ верц анзыкыла анжышывлӓлӓн тидӹ — СУПЕР!

  3. Йылмызе

    Мутат уке тӱрлӧ вачис-семен-влаклан, кӧ марий-влак нерген эре удам гына ойла, кӧ шке йочаж-уныкаж ден рушла кутырен да кутыра. Оксалан верч интернетыште эре марий чолгаеҥ-влакым шорын, мысккылен кия да темда. Тыгай «простой марий-влаклан» чынжымак нимогай пайда ты мутер деч…

  4. Женя

    Гонорар манме шамычым мыняре налыныт?

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s