Эстонийыш Талешке кечыш «Кна вел» толын

Вӱдшор тылзын 29 кечынже Тарту Литератур пӧртыштӧ Талешке кечылан пӧлеклалтше кугу мероприятий эртен. Тушто мӱндыр Татарстан гыч «Кна вел» марий ансамбль лийын. Лӱмлӧ кечым Эстонийыште ныл олаште палемдат. 

Талешке кечым пайремлымаш Эстонийыште эше 19-ше вӱдшорыштак тӱҥалын. Ту кечын «Тарту марий-влак ушем» Жанна Тохтын сӱрет ончержым почын.

26-шо апрельыште, шке Талешке кечынже, Тарту чолгаеҥ-влак марий калыкын чапшым фестивальыште араленыт.

«Кна вел» ансамбль Эстонийыш 28 вӱдшорын толын. Икымше кече Выру кундемыште шке мастарлыкшым ончыктен коштын.

«Кна вел» Тартушто:

Тартуш нуно эрлашыжым кечывалым автобус дене толыныт. Уна-влакым «Тарту марий-влак ушемым» вуйлатыше Васли Николаев вашлийын. Унагудышто вераҥме да кечывал кочкышым ыштымеке, ансамбль еҥ-влаклан Анна Мишина да одо Николай Анисимов Тарту олам ончыктеныт.

Талешке кечылан пӧлеклалтше кас Сылнымут пӧртыштӧ 8 шагатлан тӱҥалын. Погынышо калыкым Джереми Брэдли ончыч марла саламлен да вара эстонла Вена кӱшылшкол пелен улшо Марий проект нерген каласкален. Презентацийжым Джереми марла ыштен.

Вара Татьяна Албахтина, Светлана Акельдина да моло «Марий кумыл» ансамбль ӱдыр-влак марий вургем дене палдареныт. Ты гана Натали Пӓртинлан кӧра курык марий вургемымат ончыкташ йӧн лийын.

Анна Мишина (тӱмыр) ден Инга Погонина (ия ковыж) курык марий сем-влакым шокталтен пуэныт. Ансамбль гыч ӱдыр-влак «Чеверынат-чеверын» мурым муреныт, Лиза Салмиянова муро семым флейте да И.Погонина фортепьяно дене шоктеныт. Вара «Марий кумыл» ансамбль Алабога вел куштымашым ончыктен.

Жанна Тохт кӱчыкын шке ончерже нерген каласкален пуэн.

Мероприятийын тӱҥ ужашыже — тиде «Кна вел» ансамбльын концертше. Татарстан гыч уна-влак шке кундемысе тошто марий мурым шергылтареныт, тӱрлӧ верыште илыше марий-влакын мурыштым, куштымашыштым ончыктеныт. Ӱдыр-влакын ныжылгын кушталтымышт, эрге-влакын чолган тавалтымышт ончаш толшо калыкын чонжым савырен. Поснак Роман Назыровын уло чонжымак пыштен тывырдыкым кушталтен колтымыжо ончышо-влаклан пеш келшен.

Вара пайремыш погынышо калыкым поян ӱстел вучен. Кочкын-йӱын, икте весе дене кутыралтен, тӱшкан муралтен, кушталтен йӱд марте пайремленна.

Эрлашыжым уна-влак Таллинныш автобус дене каеныт.

29 вӱдшорышто Таллинн воктен улшо Сауэ изи олаште «Финно-угор калыкын талешкыже-влак» лӱман семинар эртен. Семинарышке Морко район Коркатово лицейын туныктышыжо-влакым унала ӱжмӧ. Нуно эстон туныктышо-влак дене пырля марий талешке-влак дене палдареныт. Мероприятийын тӱҥ организаторжо — Алексей Алексеев.

30 апрельыште Таллинн университетыште пайрем кас лийын. Тушто «Кна вел» ансамбль выступатлен. Тиде кечынак марий куштымаш кас эртен.

2 майыште таллиннысе «Artis» кинотеатрыште режиссёр А.Алексеевын «Шкетанын мландыштыже» киножо ончыкталтеш. Кином 2013 ий кеҥежым Оршанке районышто войзалтын.

1-ше гыч 3-шо май марте «Кна вел» ансамбль Эстонийыште эртыше йӱла куштымаш «Sabatants» фестивальыште лиеш. 3-шо май кастеным ансамбль марий куштымаш мастар-классым эртара.

Жанна Тохтын Талешке кечылан пӧлеклалтше ончерже Тарту Литератур пӧртыштӧ эше 10-шо май марте виш лиеш.

Эстонийыште эртыше Марий талешке кечын тӱҥ организаторжо парышдыме ушем «Фенно-Угриа Тӧнеж» улеш. Тартушто «Тарту марий-влак ушем», Таллинныште «Таллиннысе марий ушем» эртараш полшат. Сауэште семинарым эртарымаште да Таллинныште фильмым ончыктымаште эн чот А.Алексеев тыршен.

Талешке кечым эртараш Эстонийысе Родо-тукым программе, Культур капитал полшеныт. Тартушто пайрем ӱстелым Эстонийысе изи калык-влак ассоциаций — Eestimaa Rahvuste Ühendus заказатлен. Эстон калык музейлан уна-влакым вокзал гыч унагудыш да мӧҥгешла намиен кодаш изи автобусым яра пуымыжлан кугу тау.

Тартушто эртыше Талешке кече гыч фото-влак:

Васли Николаев,
Тарту марий-влак ушемым вуйлатыше

Артикльым возымо годым «Кидшер» да «Fenno-Ugria» сайт-влакын материалыштым кучылтмо

Фотосӱрет-влакым Эркки Пӓртин да Васли Николаев ыштеныт, В.Николаев келыштарен