Жанна Тохт
Вӱдшор тылзын 19-ше кечынже Тарту литератур пӧртыштӧ Эстонийыште илыше Жанна Тохтын выставкыже почылтеш.
Ончер Марий талешке кечылан пӧлеклатын да 10-шо ага марте шуйна.
Жанна Марий Элысе Морко район Шенше ялеш шочын. Вич ий Йошкар-Оласе талантан йоча-влаклан ыштыме школ-интернатыште сӱретлаш тунемын. Марий университетым тунем пытарен. Эстонийыш марлан лектын да кызыт эстон марийж дене Йыгеваште илат. Жанна ден Мартинын кок йочашт уло.
Индеш ий сӱретлен омыл, манеш Жанна. Йочам ыштымеке, икшывым ончымо канышыш лектын да жапше шукырак лийын, тыге тудын сӱретлаш угыч кумылжо лектын.
Мо мылам келша, тудым ончен сӱретлем, тыге чонлан келшыше паша мылам ласкалыкым конда, мыйым пиаланым ышта, ойла сӱретче.
Ончер 16 шагатлан почылтеш. Анна Мишина да «Марий кумыл» ансамбль ӱдыр-влак мурым мурат.
Выставкым «Тарту марий-влак ушем» почаш полша.
MariUver
MariUver 