30 январьыште Марий самырык театрын артистше, Марий Элын самырык-влаклан Олык Ипай лӱмеш кугыжаныш премийын лауреатше Александр Кожевниковын бенефисше лиеш.
Марий Эл Радиошто тудо Мурызо Эчан лӱм дене вӱдышӧ да диджей семын калыклан палыме лийын.
Талантан артист шке бенефисшылан Николай Айзманын пьесыж почеш шындыме «Кай, кай, Йыванлан» кумдан чапланыше мыскара спектакльым ойырен налын.
Кузе вес семынже, вет тушто Александр Кожевников пьесын тӱҥ геройжо Йыванын рольжым модеш, А Йыван, да Йыван веле огыл, пьесын чыла гаяк геройжо, тыгак чумыр спектакльже шке мыскара кумылжо дене калыкым чон пытен воштылаш таратат.
Спектакль тыгак весела муро-куштымашлан поян. А бенефис годым лач весела кумылжак эн шерге.
Тугеже манаш лиеш: 30 январьыште Александр Кожевников Марий самырык театрышке унала толшо калыклан, чынжымак, пайрем кумылым пӧлеклаш ямдылалтеш.
Билетын акше 150 да 200 теҥге.
Пагален вучена! Толза! Александр Кожевников дене весела лиеш!
Марий самырык театр
Налмывер: Марий самырык театр КонтактЫште
MariUver 