Марий ансамбль Эстонийыште выступатла

Марий ансамбль эстон гимназий ончылно14 гыч 20-шо октябрь марте Эстонийыште адакат Родо-тукым калык-влаклан пӧлеклалтше пайрем кече-влак эртат.

Йӱла почеш шыжа тылзын кумшо арняжын Эстонийыш Европо да Российын тӱрлӧ верлаж гыч финно-угор ансамбль-влак толыт. Тиде ийын фино-угор тӱвыра коклаште марий калыкын ойыртемжым Тартушто илыше марий-влак организацийын ансамбльже да унала толшо «Лай мардеж» коллектив ончыктат. Озаҥ гыч ансамбльын, «Фенно-Угрийын» полшымыж дене эртаралтше, изирак гастрольжо нерген кумданрак каласкален пуена.

«Лай мардеж» Татарстан калык-влак ассамблей пелен улшо Озаҥ марий-влакын калыкле-тӱвыра автономийыштын ансамбльже. Коллективыште культур пашам автономийысе самырык-влак наҥгаен да вияҥден шогат. Эстонийыш ансамбльын куд еҥже толын. Софья Шарабуева музык аланыште кӱшыл образованийым налеш, тунемме деч посна тудо Озаҥ консерваторий «Татарика» оркестрыште руш калык инструмент – домра дене шокта. Галина Алжиковат шке тӱҥ пашажым мурсем алан дене кылден, фортепианом шоктымо дене пырля, музыкшанчызылан тунемеш. Роман Назыров — рвезе-влак коклаште эн чолга марий тывырдык куштызылан шотлалтеш, такмак-влакым шелгартарымыж денат виян улеш. Алексей Ахтямов фармацевтике сферыште пашам ышта, спорт дене пеҥгыде кылым куча – талын куржталеш. Тидын годымак, тудо «мардеж» йолташыж-влак дене пырля репетицийыш, концертлашке кошташ жапым муэш. Александр Славин уло куштызо-мурызым иктыш чумыра. Группын чыла ӱдыр-рвезыжат тӱрло семӱзгар дене шоктен моштат гынат, Сашам эн тӱҥ гармоньчо манаш лиеш. Тыгак тудо шӱвырымат пеш чаплын пуалтара. Саша Озаҥысе Тӱвыра институтышто туныкта. Аня Таныгина — ансамбльын самырык участникше, тудо тений Озаҥ кугыжаныш консерваторийыш тунемаш пурен.

Самырык ӱдыр-рвезе-влак Сааремаа отрошто да Вильяндимаа уездыште шке 45 минуташ концерт программыштым ончыктат, Таллинныште Родо-тукым кече-влакым иктешлыше кугу концертыштат шке мастарлыкышт дене палдарат.

Теҥгече «Лай мардежын» икымше гастроль кечыже эртен. Ансамбль Сааремаа мландын Куресааре олаштыже Родо-тукым калык кечылам почын. Олан кок гимназийыштыже урок жапыште пайрем заллаште марий концерт-влак эртеныт. Марий ӱдыр-рвезе-шамыч олык марий такмак, Пошкырт куштымаш, Ныргында вел калык муро да моло сӧрал номер дене ончышым куандареныт. Программым ужар сывынан, рывыж упшан чолган шындыме Шернур вел сӱан муро-куштымаш поснак чот сӧрастарен. Йоча-влак уло кумылын совым кырен шинчышылак пырля тавалтенат колтеныт.

Кастене «Лай мардеж» верысе рестораныште «Öiеti» эстон куштыжо группо дене вашлийын. Тушто марий да эстон ӱдыр-рвезе-влак икте-весыштлан почела изирак концертым ончыктымо деч посна, ваш-ваш икмыняр куштымашымат туныктен шуктеныт. Поснак эстон рвезе-влаклан марий тывырдыкым тунемаш келшен.

Кужу паша кече моткоч писын да виян эртыш. Куресааре олаште марий концерт-влакын координаторын порын вашлиймыже, школлаште куанен ончышо йоча-влакын поро кумылышт кужу корно гыч толшо ансамбльын куатшым адакат ешарышт, нойымым кораҥдышт. А таче нуным Вильяндишке корно вуча, но туш лекме деч ончыч мурсем мастар-влак Куресааре олан замок-тоштержым ончал лектыт, Финн иксан вӱдшӧ воктене олам коштын савырнен шуктат.

Вильянди мландыште чолга ансамбльым адакат школлаште вучат. Тылеч посна ӱдыр-рвезе-влак 18 октябрьыште «Пяримусмуузика Айт» тӱвыра рӱдерыште шагат утлаш мастар-классым пуат да изирак тунеммашым эртат. Кастене тудо рӱдерыштак концертым ончыктат.

Шуматкече кастене, 19 октябрьыште «Лай мардежын» мурымаш-куштымашыжым Таллинныште «Мустпеаде Мая» пӧртыштӧ Родо-тукым кече-влакым иктешлыше кум шагаташ концертыштыже ужаш лиеш. Но тылеч ончыч ансамбльын еҥже-влак моло Эстонийыш мийыше Родо-тукым уна-влак дене пырля Таллиннын Тошто олашкыже экскурсий дене миен толыт, олан моло ужашлажым шымлат.

Нуно эше вес ола ден яллаште эстон калыкын илышыж дене сайынрак палыме лийыт. Тыге рвезе-влак шке шинчымашыштым кумдаҥдат, моло родо калыкын илыш да тӱвыраж дене келгынрак палыме лийыт. Тыгак Юл тӱрысӧ мланде да марий калык нерген каласкалат. «Лай мардеж» вашлийше калыклан куан кумылым да поро ю вийым шарен кода манын ӱшанаш лиеш. Самырык-влаклан эшеат весела ончызо-влакым да юзо мурсем пашаштыштат, тыглай ылышыштат сай сеҥымашым тыланена, да шочмо мӧҥгӧ мландыштышт куанен вучена!

Альбина Иванова

Видео да фото-влак авторын

Оставьте комментарий

Filed under Артикль-влак, Видео, Фото-влак

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

w

Connecting to %s