Анатолий Куклин Марий Элыш пӧртылаш ок шоно

Анатолий Куклинын ешыж дене Красноярск кундемыште, Тура посёлкыш, илаш да пашам ышташ кайымыжлан ятыр ий эртен. Но тудо кажне кеҥежым шочмо кундемышкыже толын кая. Тидын дене меат пайдаланена да кажне толмыж еда ужын мутланена. Теният, вашлийде, мутым вашталтыде ышна код. Илышыштыже ала иктаж вашталтыш лийын? У мурым воза мо? Воза гын, нуным кушто да кунам колын кертына? Икмыняр моло йодышланат вашмутым тенданат, пагалыме лудшына-влак, пален налмыда шуэш, очыни.

– Толя, тений шочмо кундемышкет кунамрак толынат?

– Ме пелашем дене коктынат туныктышылан пашам ыштена, сандене отпускыш уло еш дене июньыштак, тунемме ий мучашлалтмеке вигак, толынна. Никитанат кызыт – каникулжо. Сентябрьыште тудо визымше классыш кая.

– А эргыдам пелашет дене коктынат туныктеда?

– Иктыжат огына туныкто.

– Кузе тыге?

– Пелашем кугурак класслаште тунемше ӱдыр-шамычлан физкультура урокым вӱда. А мый музыкальный школышто пашам ыштем. Ондак Никита тушко коштын, но мый декем огыл, а куштымаш кружокыш. Эрге йочас, сандене вараже спорт секцийыш куснен.

– Тугеже ачаж семын мураш огеш йöрате?

– Такше йöрата. Тений мемнан дене школышто фестиваль эртен. Тушто тӱрлö калыкын мурымашыже, куштымашыже, йӱлаж дене палымым ышташ, пырдыжгазетым ямдылаш кӱлын. Меат тудым ямдыленна да пырдыжгазетыште Марий Эл дене палдаренна: мыняр район уло, мыняр марий ила да тулеч молат. Марий калык нерген эргым каласкален, марла мурымат мурен – мыйын возымо «33 роза» мурым.

– Тидыже йоча муро огылыс.

– Йоча муро огыл, но тудо ятыр мурем кокла гыч лач тидым ойырен налын.

– Тендан туныктымо школышто марийже тетла иктат уке, сандене эргыда тиде пашам шуктен мо?

– Туныктышо коклаште марий-шамыч шукын улыт. Поснак – У Торъял район гыч. Кодшо курымын 70-шо ийлаштыжак тушко пашам ышташ мийыше марий-влакат улыт. Музыкальный школышто гын ме Советский район гыч ик марий пöръеҥ дене пырля пашам ыштена. Тудо баяным шокта, кеч икмыняр ий ончычак пенсийыш лектын. Мемнан тушко кайымыланат шушаш ийын лу ий лиеш. Жап писын эрта.

– Йошкар-Олаште пачерым налында. Тугеже ынде пöртылынат кертыдас.

– Пöртылынжö тыште кушто пашам ышташ тӱҥалына? Перспектива манмыже могай?

– Палет, тый веле огыл, вес кундемыште пашам ыштыше-влак кокла гыч шукынжо тыге ойлат.

– Тиде тыгак, сандене чыланат тыге ойлат. Мыламат, пöртылмеке, тыште бродячий музыкант семын кошташ мо? Тыгай кумыл уке. Эре концерт дене коштын, ноялтмылат чучын. А тушто паша, илаш вер – служебный пачер – уло. Пашам ыштет – мыняр пашадарым налшашым палет. Йошкар-Олаште илаш верем лийын огылат, пытартыш жапыште эсогыл «Йошкар-Ола» унагудышто иленам. Йöра, палыме гоч тушко логалынам да илымылан оксам шагал тӱленам. Вараже пелашем дене коктынат туштак иленна. «Тыге тетла огеш лий. Шкан пачерым налман шонен, тора кундемыш пашам ышташ каенна. Кызыт тушто музыкальный школышто концертмейстерлан, йӱк режис- серлан да аранжировщиклан пашам ыштем. Тидын дене пырля каныш кечын аранжировкым ыштылам. Поснак йоча мурылан возаш йодыт. А тудыжым мо ышташ огыл? Шке мурем-шамыч денат шинчылтам. Тений Красноярскыште «Россий мура» авторский муро нылымше фестиваль эртен. Эвенкиште тыгай самодеятельный композитор улмо нерген пален налмекышт, тушко мыйымат ӱжыныт. Участник-влакым тӱрлö номинацийыште акленыт. Мый Красноярск нерген мурым мурымемлан икымше степенян диплом дене палемдалтынам.

– Тиде мурым пӱтынек шке возенат?

– Коклан почеламутымат шкеак возем, но тидлан ик поэтыным кучылтынам, а семжым мый келыштаренам.

– Марла мурет-влакше шочыт?

– Шочыт, но шуко огыл. Ямде муро-шамычым кызыт июньышто гына ыштен шуктымо шке сайтышкем вераҥдылам. Тудын адресше тыгай: www.muro-music.ru Але «блог певца и композитора Анатолия Куклина» возен кычалаш лиеш. Тушто ондаксе клип ден муро-влакымат колышташ йöн ынде уло. Кöн кумылжо лиеш гын, шканжат кусарен кертеш. Уке гын ола урем дене эртымем годым еҥ-шамыч шуэн огыл йодыныт: «Кунам выступатлаш тӱҥалат? Тыйым сценыште ужмо шуэш». А мыйже «Жапем уке» манам. Илыш ончыко кайыме дене кызыт тиде але тудо мурызын концертше кунам да кушто лиймым вучышаш уке. Тудын мурымыжым Интернетыште ончаш йöн уло. Кöлан мыйын мурем-влак келшат гын, нунат ынде уло тӱня мучко колыштын да ончен кертыт.

– Турашке пöртылмет деч ончыч иктаж концертыш ӱжыт гын, кает?

– Уке, кызыт тыгай кумылемак уке. Ойлемыс, кöн мыйым ончаш кумылжо лектеш гын, тидым Интернет полшымо дене ыштен кертеш. Кызыт тудо кажне пöртыштö уло. Адакшым ме пытартыш жапыште кажне ийынак еш дене кушко-гынат канаш миен толаш тыршена. Мутлан, ӱмаште, Турцийыш миенна ыле. Тиддеч ончыч Египетыште лийынна. Тений вес элыш огыл, а Шем теҥыз деке миен толнена ыле. Но тӱрлö амаллан кöра шонымашна ыш шукталт.

– Тый, сулен налме канышыш лекмешкетак, тора кундемыште пашам ышташ шонет але икмыняр жап гыч пöртылат?

– Очыни, пенсийыш лекмешкак, тушто илена. 60 ияш марте пашам ыштыман гын, эше 14 ий кодеш. А 65 ий марте ешарат гын, эше пашам ыштыман да ыштыман. Но тушто пöръеҥ-шамыч 55, ӱдырамаш-шамыч 50 ияш сулен налме канышыш лектыт. Мемнан пенсийыш лекмешке, тидым огыт вашталте да тымарте илен шуына, шонена. Тураште мыняр иленам, эше тунарак илаш кодеш, лектеш. Но мылам гын тушто келша, сандене шочмо мланде деч тораште эше индеш ий илаш да пашам ышташ кӱлмылан утыжым ом тургыжлане.

Анатолий Куклин «Букет» мурым мура, 1993 ий:

Любовь Камалетдинова
мутланен

Авторын фотожо

Налмывер: «Марий Эл» газет

Ӱлыл фото да видео А.Куклинын сайтше гыч

3 комментария

Filed under Артикль-влак, Видео, Музык

3 responses to “Анатолий Куклин Марий Элыш пӧртылаш ок шоно

  1. Аноним

    зимагор…

  2. ирвий

    очыни марий элыште унарже пытен или арака шагал лийын…

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s