Шочмо калыкнан ик эн шерге поянлыкше — йӱлышӧ чонан, кумда да келге уш-акылан, пашаче ӱдыр-эргыже. Кузе нунын вӱршерышт кыра, кузе кумылышт юарла, туге ила да шӱла марий тӱняна моло калык-влак коклаште. Марий ешнан ик тыгай шочшыжлан Галина Евгеньевна Шкалина шотлалтеш.
Ялысе туныктышо-влакын, Елизавета ден Евгений Егоровмытын, ӱдырышт таче самырык тукымым у шинчымаш дене пойдарымаште тырша. Марий кугыжаныш университетын тӱвыра да сымыктыш кафедрыжым вуйлатыше профессор, культуршанче доктор Галина Шкалина — эреак самырык-влак коклаште. Чонжо дене эреак чыным, яндарлыкым кычалше марий ӱдырамаш пӱртӱс законым илыш радамышке шыҥдараш тырша. Тудын койыш-шоктышыштыжо кугезына-влакын чий йӱлашт, айдемын да Пӱртӱсын ойыраш лийдыме вашкылже, Икте улмыжо озаланат.
Галина Евгеньевна чӱчкыдын мӱндыр кундемласе марий-влак деке лектын коштеш. Эртыше жапыште икмыняр гана Пошкырт, Виче марий-влак деке миен, нунын дене мутланен, тоштер ден архивлаште пашам ыштен. Шанчызын возымыжо марий айдемын уш-акылжым пойдараш, кӧргӧ эрыкшым кумдаҥдаш, «Мый кӧ улам» манмыжым умылаш полша. Эртыше илышын лончышкыжо ончалын, кугезына-влакын шӱлышыштым мыланна пӧлекла.
Шочмо калыкна Галина Евгеньевналан шке пӱрымашыже нерген тӱнямбалне ойлаш ӱшанен. Тудо родо-тукым Мордва, Коми, Одо, Хант-Манси да моло республикысе конференций ден форумлаште шке мутшым ойла. Шинчымашыжым, темлыме ойжым Российысе кучемын, финнугор тӱнян еҥже-влак кӱкшын аклат. Тидым 2011 ий 2 ноябрь — ыште Европысо Ушемын еҥжевлак ончылно марий тӱвырам, йылмым, тӱняумылымашым аралыме нерген докладым ыштымыжат пеҥгыдемда.
Калыкнан йӧратыме ӱдыржӧ эрге-шешкылан — поро ава, уныка-шамычлан — шергакан кова, студент-влаклан — мунло туныктышо. Таче Галина Евгеньевна йыргешке лӱмгечым пайремла. С.Чавайнын отыжым перегыше, Морко мландыжын куатшым, йӱлажым аралыше марий профессорым шочмо кечыж дене шокшын саламлена да волгыдо ӱмыргорным, кап-кыл, уш-акыл тазалыкым, пашаште тӱвыргӧ лектышым, пиалым сугыньлена. Мер Каҥаш, «Саскавий» марий ӱдырамаш ушем.
Мер Каҥаш,
«Саскавий» марий ӱдырамаш ушем
Налмывер: «Марий Эл» газет
MariUver 
Шукы пеледӹш кидӹшкет, шотеш пиштӹмӹ Галина.
Колышталашет-анжалашет музыкы шӓлӓм колтем.
http://www.youtube.com/watch?v=6OwdlKiB_ro
Шочмо кечыда дене, пагалыме Галина Евгеньевна!
Ынде Те, мудреч ийготышко пуренда гынат — тугак самырык чонан мари ӱдырамаш кодыда. Куштен шуктыза йырда ятыр шанчызе арвондым, Тендан пашада полшыжо калыкналан пеледше олык гай, гӱжлен-мурен шогаш ыҥгай!