19 мартыште Ижевскыште Мер Каҥаш черетан пленумым эртарен
Икымше гана калыкнан мер ушемже пошкудо мландышке, Одо Республикышке, лектын. Тӱрлӧ регионла гыч толшо марий-влак ончылно «Одо Марий ушемын» председательже Анатолий Радыгин ойлен. Шочмо йылмым туныктымо, аракам йӱмӧ ваштареш кучедалме, калык йӱлам вияҥден толмо нерген И.Кузнецова, С.Архипова, Ж.Якимова каласкаленыт.
«Угарман мари», «Мишкан» историй да тÿвыра рӱдер, «Сулий» марий культур рӱдер, Татарстанысе марий-влак лӱм дене И.Алтаева, В.Байбулатов, Л.Николаева, В.Шамеев ойленыт. Нуно тачысе мер илышын сай ден ситыдымаш могыржым палемденыт.
Утларак чолга мер еҥ-влаклан Одо Республикын да Марий Элын кугыжаныш суаптарже-влакым* кучыктымо.
Каҥашпогынышто* Одо Республикым вуйлатыше-влак лийыныт: Кугыжаныш Каҥашын вуйлатышыже Александр Соловьёв, Одо Республик деч Россий Кугыжаныш Думын депутатше Николай Мусалимов, Калыкле* политике шотышто министр Владимир Завалин.
Заседанийым Мер Каҥаш вуйлатыше, Россий Кугыжаныш Думын депутатше Лариса Яковлева вӱден.
Ты кечынак Мер Каҥаш еҥ-влак Каракулино районысо Пыргында, Ныргында ял калык дене вашлийыныт. Верысе калык кугу концерт программым ончыктен. Сылне муро-куштымаш дене нуно «марий» лӱмым кӱшнӧ арален илымыштым пеҥгыдемденыт.
Зоя ГЛУШКОВА
Д.Речкинын фотожо
Налмывер: «Марий Эл» газет
*суаптар — награда, каҥашпогын — заседаний, калыкле — национальный
MariUver 
«аракам йӱмӧ ваштареш»??
Теле тылзыште, Марий Тиште Кече годым, Мер Каҥаш погынен ыле. Тунам кастене кафеште, ӱстембалне арака гына шоген.
Ойленыт, ойленыт, ойленыт… Палемденыт… Мом ойленыт вара, мом палемденыт? Могай проблемым лончылыныт, корным почыныт, йогыным тарватеныт? Муткышкылтыш упражненийым эртараш молан погынашыже кÿлеш? Тушто погын лиеш манын ондакак возымо ыле, ынде лийын, эртен манын садымак эртыше жап дене возат. А мом каҥашеныт, могай перспективым шынденыт марий калыкын ончыкылык корныжо нерген? Марийын лÿмжым кÿшнö арален илымаш — тиде мурымаш-куштымаш веле улмаш. Моло нимат ок кул. Раш: концертым ончаш погыненыт. А кузе йÿде чытеныт — тидын нерген нимом увертарыме огыл.
Мер Каҥашын каҥашпогынжым тыгай кÿкшытыштö эртарен колтымаш — пеш сай паша. Юмо ушым марий калыклан пуыжо ыле: икте-весым вурсен, шудал шÿктарен кийыме олмеш, пырля пашам кузе шотшо дене вораҥдарен колташ манын шоналташ.