Француз марий йылмым тунемеш

Франций тÿвыра министерствын пашаеҥже Винсент Лоренцини (Vincent Lorenzini) шукерте огыл Тартуш марий-влак дене вашлияш толын каен.

Тудо Парижыште финн-угор йылме-влакым шымла да марий йылмым тунемеш. Тыгак Винсент Алхо Алхониемин «Марий грамматикыжым» финн гыч француз йылмыш кусара.

Кусармыж годым лекше йодыш-влаклан вашмутым муаш, марий йылмым да культурым келгынрак пален налаш манын, Винсент Лоренцини Эстонийыште тунемше марий-влак деке толын.

Франций гыч уна Тарту университетын докторантше-влак дене вашлийын. Кристина Юзиева ден Александр Пустяков Винсент Лоренцини дене марий йылме урок-влакым эртареныт, тыгак уна нунын да Геннадий Антропов деч диктофоныш марла кутырмым возен налын. А.Пустяков ончыч Тарту университетыште марий йылмым туныктен гын, К.Юзиева — кызыт.

Кÿшылшколын* докторантше Сергей Никифоров Винсетлан марий йылмым тунеммаштыже шуко сай каҥашым пуэн.

Тарту марий-влак ушемын чолгаеҥже-влак Васли Николаев да Василий Петров мэр паша дене палдареныт, Винсентын марий тÿвыра да йылме нерген йодышышт-влаклан вашештеныт.

Винсент Лоренцини кеҥежым марий йылме да культур курслаш, Йошкар-Олаш, толаш шона.

MariUver

*кÿшылшкол — университет

Фотосÿретым Винсент Лоренцини шке пуэн