Кузе «сектант» Орозаев Марий радион хит-парадышкыже логалын

Иван Орзаевым шукынжо Витлыгечe (Пятидесятник) черке пашаеҥ, Юмо нерген кристиан почеламут ден мурым возышо семын палат. Южо кристиан тыным* палыдме марий витлыгечызе-влакым* «сектант» манеш. Кузе вара И.Орозаев чоншÿлыш* муро гыч йöратымаш нерген мурыш куснен. Тидым «Марий Эл» газетын корреспондентше Любовь Камалетдинова рашемден.

«Чынак, илыш, Юмо нерген шонаш таратыше пашаже тудын шагал огыл. Ты шотышто Иван моткочак кӱлешан сомылым шукта. Но шукерте огыл тудо молыж деч ойыртемалтше, весела семан «Йӧраташ гын, йӧраташ» мурым возен. Марий Эл радион эртарыме хит-парадыштыже кок арня ончыч тудо икымше верыш лектын ыле. Чыла тидын нергенак таче мутланена.

— Иван, хит-парадыште «Йӧраташ гын, йӧраташ» муретын икымше верыш лекмыжлан шкеже ӧрынат?

— Öрынамат, куаненамат, молан манаш гын тудым иктаж октябрь мучаште-ноябрь тӱҥалтыштырак веле намиен пуэнам ыле.

— Тидым ышташ такше тыйым мо таратен? Кызыт чылан мурызо лийыт да тыйынат нунын радамыш ушнымет шуын мо?

— Тугерак. Шукын шке мурыштым темлат да мыят конден ончаш лийым. Такшым тушто икмыняр мурем уло, но нуным гитарым шоктымо почеш мурем. А «Йӧраташ гын, йӧраташлан» фонограммым ыштенам. Тыгай муремже — икымше. Калыклан келша гын, эше весымат возем, уке гын, умбакыжат гитара почеш гына мураш тӱҥалам, шоненам. Мурем икымше верыш лектын гын, тугеже еҥ-влаклан келша. А тыге гын, умбакыже пашам ышташ лиеш.

— Тудым кӧ возен?

— Мутшымат, семжымат шкеак возенам. Йоҥгалтарыме чыла муремын авторжо шкеак улам. Икымше почеламутым армий гыч пӧртылмеке серенам. Тунам чонемлан моткочак йӧсын чучын да Юмылан пӧлеклен возенам. Тудо ик татыште манме гай шочын. «Мый вашкем тый декет, Иисусем» маналтеш. Тиде Карелийыште, Библий институтышто, тунеммем годым Санкт-Петербургышто эртыше конференций жапыште лийын. Тылеч вара эре возем. Возымекем, пелашемлан ончыктем. Тудо — филолог, сандене редакторем гай. Кӱлеш гын, тӧрлатымашым пурта. Сем-влак гын изиш варарак шочаш тӱҥалыныт.

— Музык шинчымашет укес, семым возаш неле огыл?

— Уке, нелылыкым ом шиж. Мый Палантай лӱмеш тӱвыра да сымыктыш колледжын эстраде пöлкаштыже кок ий тунемынам. Тудым пытарыде кудалтен каенам гынат, ты жапыште налме шинчымашат чотак полша. Кумло ийым эртымеке, почеламут ден семым возаш, мураш тӱҥалам, эстраде аланыш ушнем манын, ончыч шоналташат тоштын омыл. Сандене чылажымат Юмо пуа, шонем.

— Черкыште кӧлан пашам ыштет?

— Мый пасторын полышкалышыже улам. Тушто марий-влак, погынен, Юмылан кумалына, мурым мурена.

— Тыгай йодышем ала келшен толдымын йоҥга, но мурым мураш черкыш погынаш кӱлеш мо? Тидым мӧҥгыштат ышташ лиеш…

— Мурым, чынжымак, мӧҥгыштат мурен шинчаш лиеш. Но неле годым ойго пызыра, темда да ушышко тӱрлӧ шонымаш толын пура. «Молан илем? Кӧлан кӱлам? Лучо ты тӱня гыч каем» манын шонаш тӱҥалат. Санденак тыгай годым южышт шкеныштым шке пытарат, илыш дене чеверласат. А ме неле-йӧсым, ойгым йолташ-влак дене пырля Юмо, илыш нерген муро гоч луктын каласена. Тыге чоннам куштылемдена, паремдена. Тидыже поснак полша, шонем. Мый черкыштына веле огыл мурем, тыгак район еда, ял еда икмыняр эстраде мурызо дене пырля концерт дене коштына. Туштат утларакше илышым аклаш туныктышо, икшыве, ава, Юмо нерген шонаш, шке илышым савырнен ончалаш таратыше муро-влакым йоҥгалтарем. Тачысе кечылан тиде — мыйын ик эн тӱҥ пашам. Тиде сомыл шканемжат мыйынлыклак чучеш.

— «Йӧраташ гын, йӧраташ» мурет вес сынанрак. Тушто тый йӧратымаш историй нерген весела сем почеш мурет. Тудо шкеч нерген?

— Такше шкем нергенат манаш лиеш. Но тыгай гоч ятыр еҥ эрта, сандене ятырыштлан келшен толеш, шонем.

— Ончыкыжым весела кумыланым але Юмо нерген мурым утларак возаш тӱҥалат?

— Весела кумыланжымат возаш шонымаш уло. Юмо нергенат мондаш огеш лий. Илаш пӱрен гын, илышым куанен, весым куандарен, йӧратен, аклен да пагален илаш кӱлеш. Юмо лач тыге ышташ темла.

Любовь Камалетдинова мутланен»

Налмывер: «Марий Эл» газет

* Витлыгечызе — пятидесятник, кристиан тын — христианство, чоншÿлыш — духовный

1 комментарий

Filed under Артикль-влак

One response to “Кузе «сектант» Орозаев Марий радион хит-парадышкыже логалын

  1. Вачи

    Орзай Йыван чапле мурым шочыктен! Умбакыже муролакым вучаш тӱҥалына.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s