Ик шот дене Усолаште икмыняр ий ожнак тÿҥ школым чоҥаш тÿҥалшаш ыльыч. Тидлан кÿлеш документ-влакым шукертак ямдылен шуктымо гынат, ала-могай амал дене тиде паша шуялте. Икманаш, кодший шошымсо пожар деч вара гына тÿҥалтыш школым чоҥаш содоррак пижыч.
Тиде поро сомылым ик ий жапыште «Мостостроительное управление» организаций (тÿҥ директоржо Рим Жданов) ыштен шуктыш. Чылаже латкум миллион теҥгем кучылтмо. Тиде кугу пöртыштак фельдшер-акушер пунктат верланен.
Шинчымаш кече деч ик арня ончыч школым почаш лÿмын Башкортостанын Президентше Муртаза Рахимов да республикын калык образований министрже Зиннат Аллаяров тольыч. Тунемше-влак, нунын ача-авашт, ял калык шергакан уна-влакым шокшын вашлийыч.
Шаран муниципал район администрацийын у вуйлатышыже Ильгиз Самигуллин погынышо калыкым саламлыш, школ чоҥышо-влаклан таум каласыш, школ вуйлатышылан пöлекым кучыктыш. Вара Башкортостан Президент М.Рахимов мутым нале. Школ вуйлатыше Людмила Шамыкаева, Акпарс ял шотан илемын депутатше-влак лÿм дене Римма Ахметшина республикын президентшылан, правительствылан, район администрацийлан чапле, ялым сöрастарыше полатым жапыштыже чоҥен шуктымылан ял калык лÿм дене кугу таум каласышт.
А. АСМАЕВ,
Шаран район
Пошкырт кундем
Налмывер: «Чолман» газет
MariUver 