«Каче-влак» группо гыч Сергей Романов чыла вере шуэш (ВИДЕО)

Сергей Романов Тачысе эстрадым тӱрлӧ тӱсан пеледыш дене таҥастараш лиеш. Иктыже путырак чолган волгалтеш гын, весыже изишак шапалгырак, кумшо пеледаш гына тӱҥалеш, нылымше пелед шудеак лывыжга…

Тыгодым ме ик айдемын кушмыжым, весын шӱдыр чер дене черланымыжым да ик верыштак тошкештмыжым эскерен кертына. Но моторлыкым але мастарлыкым пӧртйымалне шылтен от ашне. Тудо садак, кечыйолым шижын, шытен лектеш. Тыге поҥгыла кушшо мурызо-шамыч коклаштат чын шӱдыр-влак ятырын улыт. Ты радамыште самырык еҥат шагал огыл.

Пытартыш жапыште тӱрлӧ концертыште калык «Каче-влак» группым совым рӱж кырен вашлиеш. Тиде коллективыште – кум пӧръеҥ. Кажныже шкешотан, мастар да пырля улшо йолташыжым шижын моштышо. Кумыт гыч кокытшо ийгот дене илышыште шукырак ужшо улыт гын, Сергей Романов (снимкыште) 1988 ий 29 сентябрьыште шочын. Рвезын шочмо-кушмо вер-шӧржӧ – Волжский районысо Карай ял.

Икымше ошкыл: вич ияш гычак — сценыште

Romanov_1— Изием годым, шарнем, мӧҥгыштӧ «Илеть» кугу гына магнитофон ыле, — каласкала Сергей. – Тудым чӱкташ йӧратенам. Пӱкеныш кӱзен шогалын, магнитофон почеш эреак муренам.

С.Романов сценыш икымше гана вич ияшак, школлан ямдылалтме классыште тунеммыж годым, лектын. Тунам тудо моло йоча дене пырля марий куштымашым калыклан ончыктен. А икшыве-шамычым шке йырже, «Эрвий» ансамбльыш, Карай каныме да тӱвыра пӧртын хореографше Егор Кузьмич Савельев чумырен.

Ансамбль шке кундемыште гына огыл, ӧрдыжтат палыме лийын. Теве ӱдыр-рвезе-влак Озаҥыште выступатленыт, а Сергей тудын лӱм дене «Орлёнок» лагерьышкат миен коштын.

«Егор Кузьмич тӱҥалтыш ошкылым ышташ полшен, тӱвыра аланышке корным ончыктен, — палемда чолга еҥын тунемшыже. — Е.К.Савельевын ӱмыржӧ лугыч лиймеке, чаманен каласыман, «Эрвий» ансамблят шаланыш. Мыйым шкеж веке, Корамас коллективыш, Геннадий Семёнович Яндимиров шупшыльо. Ик жап нунын дене кылым кученам, пырля пашам ыштенам. Тушто муренам, куштенам, тӱмыр денат шоктенам».
Сергей таче эше гитара, пианино, синтезатор дене шоктен мошта.

Школ пагыт. Тудын кышаже  — ушышто, чонышт

С.Романовын икымше туныктышыжо Любовь Ивановна Гордеева лийын. А классыште кандаш ӱдыр да ик рвезе тунемын. Чын, ик рвезыже — лачак Сергей. Тунамсе пагытым тиде чолга колой моткоч порын шарна, вет икымше туныктышо икшыве-влакым эргыж ден ӱдыржӧ гаяк йӧратен, пагален, шукылан туныктен.

Варажым Сергей Романовын ик эн йӧратыме туныктышыжо В.В.Янцитов лийын. Тудо Карай школышто информатикым туныкта, директорын воспитательный паша шотышто алмаштышыжлан тырша. «Владимир Валерианович визымше класс гыч шкемым чыла вере (мутлан, культурышто, спортышто)  терген ончаш йӧным пуэн. Теве Республикысе кино фестивальыште участвоватлыме. Тушто «Ик эн сай сценарий» номинацийыште сеҥышыш лекме», — тудо пагыт да воктенже лийше еҥ-влак нерген кугешнен ойла Сергей.

Школышто тунеммыж годым С.Романов кажне ийын походыш коштын. Тыге тудо шкеж деч кугурак ийготан йолташыж-шамыч дене пырля пӱртӱсымат, марий мландымат аралаш тунемын.

Кызыт студент. Салтакыш каяш ямдылалте

Romanov_2— Студент илыш эреак весела, мемнан факультетыште чолга кумыл путырак озалана. Ойгырен, йокрокланен шинчаш жап йӧршын уке. Эре мурена, куштена, — шомак ярымжым умбакыже шуя Марий кугыжаныш университетысе тӱвыра ден сымыктыш факультетыште кокымшо ий хореографлан тунемше Сергей Романов. Олаш тунемаш толмеке, тудо вигак «Марий памаш» ансамбльыш ушнен. Туштак тачысе «Каче-влак» коллективысе йолташыж-влак дене вашлийын. Ынде кок ансамбльже денат шуко выступатлаш логалеш. «Каче-влак» дене кажне арнян гаяк районыш лектын коштеш.

— 11 классыште тунеммем годым 9 май вашеш сценкым район кӱкшытыштӧ шындыме ыле, — угыч шарналта рвезе. —  Тушто салтакын рольжым модынам. Теве снимкыштат серышым пеш возем. Шкеже эше салтак лийын омыл. Ончыкшым каяш шонем, вет армийышке кочамат, ачамат миеныт. Рвезе-влак служитлышаш улыт.

Спорт дене пеҥгыде кыл лийша

Кушмо семын Сергейын ончылныжо кумдарак да кумдарак илыш корно почылтын. Рвезе тӱрлӧ могырым шуаралташ тыршен. Теве тудо спорт деке кумылаҥын. Телым ече дене коштын гын, кеҥежым куржталын. Тыгак волейбол, баскетбол, футбол дене модын.

С.Романов кызытат спорт дене пеҥгыде кылым куча. Марий кугыжаныш университетысе чыла гаяк мероприятийыште вийжым терга, йӧн лийме семын таҥасымашкат ушна. «Тиде шкаланна, кап-кылым формышто кучаш манын кӱлеш. Тыге айдеме шӱм-чон денат таза лиеш», — пеҥгыдемда йӧратыме артистна.

«Тачысе самырык тукымлан шкем муаш полшыман

Romanov_3Тидымак Сергей Романов темла. Тудо ешара: «Айдемылан чын корным йоча садыштак, вара школышто муаш да вияҥдаш полшыман. Тыге икшывын ӧрыктарыше ойыртемжым ужын, тудым шуарен шогыман. Мыйын шонымаште, тыгодым туныктышо-шамычлан тӱткӧ лийман. Да кызыт пагытшак тыгай. Шуко йоча осал койышан, шаларак кушкеш. А жапыштыже тудым кучен моштет гын, чыла сай лиеш».

Рвезын кушмо корныштыжо кугу негызым туныктышо-влак пыштеныт. Кызыт тудлан йолташ, иза да ача семын «Каче-влак» ансамбльын участникше-шамыч — Сергей Попов, Валерий Чиванов — улыт. «Тиде саман неле манын, ойгыраш огеш кӱл, — тылана С.Романов. — Шкендым кучен, вияҥден шогаш тӱҥалат гын, кеч-могай нелылыкат куштылгын чучеш. Ончыко да ончыко, нимо деч лӱдде ошкылаш да илыш корнышто эреак кушкаш кӱлеш».

Паша да тунеммаш деч посна айдемын эше шке илышыже ул

Ты шотышто чолга рвезе тыгерак каласыш: «Пелашем кызытеш уке. Но тиде, мыйын шонымаште, кугу йодыш огыл. Кеч-кунамат ӱдырым марлан налаш лиеш, вашкаш нимолан, вет але студент улам. Чын, кажнын гаяк мыйынат йӧратыме да йӧратыше еҥем уло. Тудо илыш корнем волгалтара, шӱм-чонем кумылаҥда, вийым ешара».

Ушан-шотан чолга еҥ-влак, шолын шогышо школ илыш, кумдан ончен моштышо туныктышо-шамыч, тыгак тукымвож, вет Сергей Романовын ачажат музыка деке кумылан лийын, гитара дене шоктен, аважат, коважат мурат. Чыла тиде «Каче-влак» да «Марий памаш» ансамбль-влакын чолга да мастар рвезыжлан кӱлеш семын шуаралташ амалым ыштен. Таче Сергей шке ешыжым (тудым аваж ден коваже ончен куштеныт) артист койышан манын палемда да воктенже лийше, улшо еҥ-влаклан кугу деч кугу таум каласа. Тек тыгай айдеме-шамыч чынже денак шуко лийыт. Шотыш налза, кугурак ийготан таҥна-влак, йочам изинекак виктарен моштыман. Тунам тудын ончыкылыкшо волгыдо лиеш, шкежат илышнам ворандараш тӱҥалеш.

Марий Эл ТВ-н Сергей Романов нерген видеосюжетше:

Эльвира Куклина

Текстым «Кугарня» газет да видеом Видео в Марий Эл.ру гыч налме

Оставьте комментарий

Filed under Артикль-влак, Видео

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

w

Connecting to %s