Марий-влаклан шочмо йылмышт ок кӱл?

Ф.БикбатыровШколлаште шочмо йылмым арален кодымо йодыш тӱрлын вияҥеш. Иктышт ача-авам титаклат, весышт йоча-влакын кумылыштым ончат, кумшышт административный вий ваштареш кучедалаш ок лий манын палемдат. Тыгодым икте-весе коклаште ик ойыш шуаш тыршымаш шагалже годым коеш.

Марий форумышто Пошкырт кундем, Калтаса районысо «Эрвел марий» национально-культурный автономийым вуйлатыше, Мер Каҥашын еҥже Ф.Бикбатыров тидын шотышто пеш сай примерым каласкалыш.

— Киебак школын икымше классышкыже тунемаш толшо йоча-влаклан ӱмаште тунемме идалык тӱҥалтыште марий йылмым туныктен огытыл. Ача-ава-влаклан йочаштым тунемаш налме нерген йодмашыште марий йылмым тунемаш тореш улмышт нерген возаш директор темлен. Кузе кӱштен, ача-ава-влак тугак ыштеныт. 1 сентябрь гыч марий йылмым туныктымым чарненыт.

Тиде увер мемнан деке миен шуын. Ме лекше йодышым инициативный группа дене писын гына каҥашенна. Тушко Калтаса районын почетан гражданинже Михаил Илтубаевич Илтубаевым ушенна. Калыкыште изиш лӱшкымаш лектын. Чыланат марий йылмым арален кодымо верч лийынна. Районышто 5 октябрьыште лачак сайлымаш лишемын. Район администрацийым вуйлатыше тиде йодыш утыр ылыжеш манын шекланен, мыйым шкеж деке ӱжыктен. «Калыкым тый тарватенат, ваштареш шогалтенат?» — йодын. Кузе лиймыжым мый радамын умыл- тарен пуэнам. Район вуйлатыше тунамак шке кумылын образований отделым вуйлатыше деке йыҥгыртен каласен: «Йодмаш-влакым кызытак кораҥдаш. Марий йылмым угыч туныкташ тӱҥалаш».

Тыге икымше классыш толшо икшыве-влак шочмо йылмым кок арня гына тунемде кодыныт. Тыгай «эпидемий» Калтаса район мучко шарлаш тӱҥалын улмаш. Поселкысо школышто тунемше-влакын ача-аваштым тиде корно денак колташ шоненыт. Мер пашаеҥ-влак образований отдел дене пырля тиде йодышым лыпландарен кертыныт. Федор Евгеньевичын палемдымыж почеш, районысо Ӱлыл Тыхтем школышто марий директорак марий йылмым кок ий ончычак туныктымым чарен. Кӱтерем ден Красный Холмысо 1-ше номеран кыдалаш школлаштат марий йылмым ончыч туныктеныт, а кызыт уке. «Сандене мыланна пашам чот ышташ кӱлеш. Районым вуйлатышына кызыт татар, туге гынат тудо мемнан йодмынам умылен вашлиеш. Теве марий форумыш толашат транспортым ойырыш. Кузе уке гын, тиде, маньым, политический йодыш», — кугу кумыл дене ойла Федор Евгеньевич.

Теве тыге чолган, шке правам арален моштен, пашам ыштат Калтаса районысо мер пашаеҥ-влак.

Светлана Пехметова

Налмывер: “Марий Эл” газет

3 комментария

Filed under Артикль-влак

3 responses to “Марий-влаклан шочмо йылмышт ок кӱл?

  1. Эрвел мари

    >Федор Евгеньевичын палемдымыж почеш, районысо Ӱлыл Тыхтем школышто марий директорак марий йылмым кок ий ончычак туныктымым чарен. Кӱтерем ден Красный Холмысо 1-ше номеран кыдалаш школлаштат марий йылмым ончыч туныктеныт, а кызыт уке.

    Аҥыра улыт марий-влак! Шке шочмо йылмыштым огыт пагале, йочаштым ынешт туныкто! Вара арака йӱмек «Ой мемнам тотар, башкир-влак айдемылан огыт чотло» манын мӱгырат. Кӧ тендам пагалаже? Те шкендам шке огыда пагале!

    Пытартыш жапыште йот эллаште кок (да шуко) йылман йоча-влакым, билингв-влакым, шуко шымлыме. Шымлымаш ончыктен: изинек кок (да шукырак) йылмым ик семын тунемше йоча, ик йылман йоча деч чыла шотыштат ушанрак улеш.

  2. Петан

    Палынем ыле: Яковлеван йочашт-влак марла ойлат? А Мочаевын? А моло чолгаеҥын? Тунамже молан тыгай агитацийым наҥгаяш? Тошто Мер Каҥашын Уставыште тыгай пункт ыле: Оньыжалан сайлаш мари ешан айдемым. Тиде пунктым кораҥдышт. Тыге мари шӱлышым мер толкын гыч кораҥдышт. Йӧра, «Марий форумышко» бюджетник-шамычым погаш лиеш, пеш шуко койына, куанена. А «лектыш дене моктанаш эр»…

  3. Колой

    Петан дене тӱрыс келшем.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s