Кузе калык «Мый марла ойлем» акцийым вашлийын (ВИДЕО)

gordejeva_myi_marla_ojlemКöжö тидлан öрмалген, кöжö куанен вашлийын, южышт, кидым лупшалын, умбаке кораҥаш вашкеныт, шыдын ончалшат лийыныт.

Но «ВийАр»-ын, «Очрашун», Марий Эл ТВ-н чолга, чулым ӱдыр-рвезыже-влак нимо дечат öрын шоген огытыл. Нуно кажне еҥ дене шыргыжалын, поро кумылын мутланеныт. Тыге корнышто вашлийме да марла пелештыше кажне еҥлан «Тыйын марла пелештыме икымше 150 мутет» брошюрым, марла книгам, значокым пöлекленыт.

Теве Башкортостанысе Калтаса район, Ӱлыл Качмаш школын директоржо Т.А.Павлова ден марий йылмым да литературым туныктышо Л.Л.Таниева каныш кечылаште эртыше «Марий форум-2009» конференцийыш толыныт (марий йылмым туныктышо-влакын делегацийыштышт лийыныт), мемнам пеш куанен вашлийыч. Марий форум кышкареш эртыше ты акций нерген поро шомакым каласышт:

— Марий калыклан тазалыкым, кужу ӱмырым, еш пиалым, сеҥымашым тыланена. «Мый марла ойлем!» акций — пеш пайдале, кӱлешан паша. Кушкын толшо тукымым марий йылмылан утыр шӱмаҥда, Йошкар-Олан уремыштыже мотор, самырык, марла яндарын ойлышо ӱдыр-рвезе-влакым ужын, чон куана.

«Мый марла ойлем!» тыглай акций огыл, а кугу пайрем семын эртыш. Тидым ӱдыр-рвезе-влакын чурийыштыштат ужаш лийын, молан манаш гын нунылан южгунамже шуко чаракым эрташышт пернен. Садланак акцийын тыге веселан да чынжымак кугу кӱкшытыштö эртымыжым сеҥымашлан шотлаш лиеш. Поснак ВЛКСМ-ын ХХХ идалыкше лӱмеш культура да каныме паркыште эртыше пайрем концерт куаным ешарыш.

Марий эстрадын чапланыше мурызыжо-влак Л.Сидоркина, Р.Искакова, В.Петров, Г.Григорьев, самырык мурызо К.Семенова, И.Мамаева сылне мурышт дене калык чоным ырыктышт, тавалтыктышт. Вӱдышö-влак С.Карпов ден В.Гордеева ончаш толшо-влакым тӱрлö конкурсыш ушеныт, сеҥышылан пöлекым кучыктеныт.

Азербайджанка О.Маргарянын «Мо эртен, ит чамане» почеламутым марла сылнын йоҥгалтарымыже утларак кугешнаш амалым пуыш. Вес калык гыч лекше еҥын марла лудмыжо чоным поснак куандарыш. Нуно тыйын йылметым пагалат, мутланат гын, молан меже шке шочмо йылмына деч вожылшаш улына?

Акций нерген «Марий Эл ТВ»-н видосюжетше:

Лидия Шабдарова

Снимкыште: В.Гордеева «Тыйын марла пелештыме икымше 150 мутет» брошюрым сеҥыше-влаклан кучыктен.

Д.Речкинын фотожо

Налмывер: «Марий Эл» газет

6 комментариев

Filed under Артикль-влак, Видео

6 responses to “Кузе калык «Мый марла ойлем» акцийым вашлийын (ВИДЕО)

  1. Й-Олазе

    Сай акций, руш-влаклан улмына нерген чӱчкыдынрак ушештарман, вара, можыч, йылмынамат тунемаш тӱҥалыт. Но эн ончыч, конешне, мыланна, марий-влаклан, шкаланна марла яндарын ойлаш тунемаш кӱлеш. А то южгунам южо марий пеле рушла, пеле марла ола уремыште кертмыжым кычкыра…

  2. Savr

    Руш йылмат пелыже марла, пелыже тотарла.

  3. Чирмишхан

    Чыным ойлет, Й-Олазе.
    Можыч = АЛА
    Но = ТАКШЫМ, ТУГЕ ГЫНАТ
    Конешне = МУТАТ УКЕ, ОЙЛЫМАНАТ ОГЫЛ

  4. Й-Олазе

    Чирмишхан, мый таче кечысе чынвозышлан (орфографийлан) келшышын серенам. Тыйын ончыктымо мут-влак кунам-кунам марий йылмыш пуреныт да марий йылмылан келыштаралтыныт. Мый изишак вес рушла-марла йылме нерген ойлышым.

  5. Чирмишхан

    Шуко йот мутлан марий йылмыште алмаштыш уло, садлан нуным вашталтыман. Тунам мемнан йылмына яндар лиеш. Сай лийже!

  6. Петан

    Олаште пуйто марий сандалык кумдарак лие.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s