Марий делегаций Киров кундемысе Виче Алан* олаште лийын. Тушто 1 гыч 15 февраль марте марий тӱвыра кече-влак эртеныт. Нуно Марий Эл да Киров кундем коклаште вашкылым пеҥгыдемдыше ойпидыш* почеш кок ийлан ик гана эртаралтыт.
Кок арня жапыште Виче марий-влак Татарстан, Марий Эл республик-влакын ансамбльыштым вашлийыныт, шке кундемыште пашам ыштыше да калыкым куандарыше коллектив дене пырля каненыт.
Марий самырык театр йоча-влаклан «Самая лучшая морковка» йомакым, кугырак ийготан-влаклан «Йоргасоласе каче-влак» семан* комедийым ончыктен.
«Спутник» тӱвыра да спорт рӱдерыште «Марий кас» гӱжлен. Погынышо калыкым Татарстан Республикысе «Кна вел» калык ансамбль да Виче Алан олан «Пеледыш» мурышо ансамбльышт куандареныт.
Вес кечынже «Сеҥымаш» тӱвыра пӧртыштӧ виче марий-влак кид-совым кырен Марий кугыжаныш филармонийын «Марий Эл» куштышо ансамбльжым вашлийын, марий сем дене чонжым кандарен.
Концерт деч вара эртаралтше «Регион-влак кокласе тӱвыра вашкыл да тудым вораҥдарымаш» йыргешке ӱстел пӱсӧ йодыш-влакым шуко нӧлталын. Киров кундемыштат ялысе тӱвыра пӧртлаште кадр огеш сите, йоча-влаклан тунемаш книгам кушто налме нерген йодыш, сӧрастарыме да кидпаша сомылын* вияҥмыж нергенат мут лектын.
Йошкар-Ола гыч мийыше делегаций, Марий Эл Республикын тӱвыра, печать да калык-влак пашашт шотышто министрын 1-ше алмаштышыже Маркин Владимир Анатольевич, Юрьева Римма Алексеевна, Марий тӱвыра рӱдер вуйлатышын алмаштышыже, ты йодышлан вашмутым пуэныт да раш умылтареныт.
Г.Хлебова
* Виче Алан — Вятские Поляны, ойпидыш — договор, семан комедий — музыкальный комедий, сӧрастарыме да кидпаша сомыл — декоративно-прикладной творчество
MariUver 