28 февральыште Йошкар-Оласе тӱҥ каныме паркыште Марий Ӱярня пайрем лиеш.
Мероприятийым эртараш Марий рӱдер деке «Марий ушем», «Саскавий» «Ош Виче», «ВийАр» мер ушем-влак ушнат.
Марий калык тичмаш терке чес, ӱян мелна, шоҥешталтше пура, куан дене ты пайремым изижат-кугужат юарлен, модын-воштыл вашлийын. Теле дене чеверласен, калык шошым вуча, сандене «Ӱярня» мелнажат кече гай йыргешке да чевер.
Ӱярня годым ваш-ваш унала коштыт, ӱян мелнам кочкыт, икте-весым сийлат, курык гыч мунчалтат, имньым сӧрастарен гармонь дене мурен кудалыштыт. Садлан пайрем оҥайын эрта.
Пайремышке весела кумылым нӧлталаш Кужеҥер район «Ший аршаш», Медведево район «Арбан пеледыш», «Марий памаш» да «Эрвелмарий» калык ансамбль-влак толыт.
Марий Ӱярня 11 шагатлан Йошкар-Оласе тӱҥ каныме паркыште тӱҥалеш. Умбакыже ӱярня 15 шагатлан «Марий касыште» шуйна.
Г.Хлебова
MariUver 