Кажне ийын 26 апрельыште шочмо калыкна Марий Талешке кечым палемда. Тиде кечын, 1556 ийыште, Малмыж орым аралыме годым, марий он Полтыш колен.
Тудым шарнен, тыгак моло тале кугезына-влаклан вуйым савен, 1917 ийыште марий ончылъеҥ-влак 26 апрельым пайрем семын увертараш темленыт. Тиде темлымашым 1991 ийыште «У вий» ушем йыр чумыргышо самырык интеллигенций шуктен.
Тылеч вара тиде кече ик ганат мондалтын огыл. Марий историйым пагалыше, чолга еҥ-влакым аклен моштышо-шамыч, тӱрлö верыште погынен тӱрлö йöн дене Талешке кечым пайремленыт.
Пайрем йӱлам эртарыме радам але пеҥгыдем шуын огыл. Садлан Мер Каҥашын вуйверже Талешке кечым пайремлыме сценарий конкурсым увертара. Ты пашашке мер шӱлышан айдемым ушнаш ӱжына. 26 март марте Талешке кечылан пöлеклалтше пайрем сценарийым возаш темлена.
Сценарий кышкар 1,5-2 шагат жапым авалтышаш. Тыгодым сценарийын тӱҥ шонымашыже пайрем калыкын чон куатшым нöлтал колтышаш, шочмо мландым, калыкым йöратыме, аралыме шижмашым шочыктышаш. Кум номинаций уло: 1) школышто, клубышто але тӱвыра полатыште эртарыме пайрем; 2) ял, села уремыште эртарыме; 3) ола але посёлко уремыште эртарыме.
Сценарийым возышо да сеҥыше радамыш лекше-влаклан Мер Каҥаш вуйвер турист корныш лекташ путёвкым кучыкта.
Возымо пашадам Мер Каҥашын вуйверышкыже тыгай адрес дене колтыза: 424000, Йошкар-Ола, Гагарин урем, 8 пöрт, 206 пöлем. Тел.: +7(8362) 641 572. Эл. адрес: mochaev@bk.ru Мер Каҥаш вуйвер.
Налмывер: «Марий Эл» жаплышташ
MariUver 