Теҥгече Тарту олан ик лютеран черкыштыже марла чоншӱлыш муро шергылтын.
Эстон лютеран черкын Мааря погынверже* кастеным Башкортостан гыч уна-влакым вашлийын: Ану ден Юха Вялиахом, марий мурызо да композитор Константин Зайнединовым да Анна Мишинам.
Ану ден Юха ынде мыняр ий марий-влак коклаште миссионер пашам шуктен шогат. Ончыч Йошкар-Олаште пашам ыштеныт гын, кызыт — Пошкырт кундемын Пӱрӧ олаштыже.
К.Зайнетдинов — башкир марий мурызо, тыгак тудо кристиан чоншӱлыш муро-влакын авторжо. А.Мишина Пермь кундем марий, Суксо район Эҥермучаш ялысе музык школышто композитор Юрий Евдокимов дене тунемын, вара Йошкар-Олаште Тӱвыра да сымыктыш коледжым пытарен, кызыт Шупашкар олаште Культур институтышто шинчымашым пога.
Ончыч уна-влак шкешт дене палдареныт да А.Мишина урал марий калык мурым яндар йӱкшӧ дене шергылатарен пуэн. Вара чоншӱлыш* муро-влакым К.Зайнетдинов шкетынат, Анна денат пырля муреныт, южо мурыжым Ану Вялиахоат мураш полшен.
Юха Вялиахо марий-влак коклаште миссионер пашам эртарыме нерген диапозитив-влакым ончыктен да ойлен.
Касыш толшо-влакын марий тӱран вургемым, шӱвырым, йыдалым да моло арверымат ончерыште* ужаш йӧн лийын. Тыгак нуно марла лекше чоншӱлыш литературым шергал кертыныт. Поро кумылан-влак уна-шамыч деч пошкырт мӱым да марий чоншӱлыш муран CD-м налын, надырым пыштен кертыныт.
Вара мучашлан чылан пырля чайым, кофем йӱын ятыр мутланен шинченыт.
Уна-влакын корнышт Финляндийыш шуйна, нуно тушто эше шуко финн черкылаште марий-влак нерген каласкалаш шонат.
Муро файл-влакым тышеч налын да колышт кертыда:
Анна Мишина «Кукун иге мондышыч мо?» (mp3) >>
MariUver
Фотосӱретыште: Константин Зайнединов, Юха Вялиахо, погынвер пасторын пелашыже Мари Пеанурм, Ану Вялиахо да Анна Мишина. Фотом кугемдашлан темдал.
*погынвер — приход, чоншӱлыш — духовный, ончер — выставка.
MariUver 
*Башкортостан — Пошкырт Эл
«Пошкырт кундем» ойсавыртыш ик гана кучылталтын, Башкортостан, Башкирий — синоним-влак.
«Пошкырт Эл» лӱмын шонен лукмо ойсавыртыш, умылем Марий Элым негызлан налме, лиеш ышташ, шонем, но пырля возыман:
Рушэл — Россий, Одыэл — Удмуртий (о > ы редукцийлан кӧра), Суасэл — Татарстан да умбакыжат.
Эл — тугаяк -стан (ТатарСТАН, БшкортоСТАН), -land (DeutschLAND). У мут кертме семын кӱчыкрак лийшаш да ик мут кок посна мут деч эре сайрак.
У мутым ыштыме годым темлаш вел лиеш, адакшым эре вес йӧнат лийшаш, лач тыге гына возо манын, мутлан, тый мылам кӱштен от керт. Компромисым кычалман, садланак марий Википедий дене моло марий-влак пешыже огыт толаше.
Такшым чын марийлан черкыште нимом ышташ.
Шотдымо улеш тудо марий — кудыжо шке йӱлаж деч кораҥын!!!
Пагалыме Эрге да Кече, куш мылам кошташ черкыш але отыш тендан пашада огыл. Кызыт чыла вере тынэрык (свобода совести). Кӧ «чын» да «шотдымо» эше ончалаш кӱлеш. Мыйын шуко тынеш пурышо палымем-влак тендан деч марла яндаррак ойлат да возат, йочаштым марла туныктат, аракам огыт йӱ, ешыштым пагалт. А вот Юмо деч посна илыше шуко марийын арака йӱын ушыжо каен, ни пелашыштым, ни йочаштым огыт пагале, ни марла, ни рушла кутырен огыт мошто.