«У марий кува-влак» секс нерген туран мурат

novyje_rus_babkiРӱдö каналла дене чӱчкыдынак «У руш кува-влакым» ончыктат гын, мемнамат ынде «У марий кува-влак» куандарат. Нуно кушеч улыт? Морко район, Кушна вел гыч. Тиде фолькгруппым Кушна культура пöртын  директоржо Л.В.Александрова вуйлата.

— Людмила Валентиновна, культура пöртда пелен «Кушна мланде» ансамбль уло. Тугеже эше группым чумыраш шонымаш кузе шочын?

— Шкенан районысо культура отделыште ик пайрем вашеш миниатюрым ямдылаш йодыныт ыле. Номерым ыштышна. Тунам молан у ансамбльым чумыраш огыл манын шоналтышна. Тыге у коллектив шочо. Тудлан «Чонем» лӱмым пуышна. Молан лачшымак тыгайым? Кужунжо каласаш гын, тиде «Чачий, Овдачий, Начий да Мичий» манмым ончыкта, вет номерыштына ме лач тыгай лӱман еҥ-шамычым модына.

— Кузе тугеже «Чонем» «У марий кува-влакыш» савырнен?

— Тудо жапыштак Йошкар-Олаште марий КВН эртаралте,  да мыланнат таҥасымашке ушнаш темлышт. Модмынам ончымеке, мыланна «У марий кува-влак» лӱмым налаш темлышт. Лӱм шканнат келшыш,  да тудымак кодышна.

— Те тыглайым гына огыл, а фолькгруппым чумыренда. Путырак йоҥгалтшым да кызытсе жаплан келшен толшым…

—  Туге. Ме кажне гаяк номерыштына фольклорым кучылтына. Эстрада дене таҥастарымаште мыланна такмак-шамыч лишылракла чучыт, санденак фолькгруппа манынна.

— Рӱдö телеканаллаште чӱчкыдынак «У руш кува-влакым» ончыктат. Тугеже те нунын семынрак кояш тöчеда мо?

— Мöҥгешла, ме нунын деч ойыртемалтше номерым ямдылаш тыршена. Тидлан яллаште вашлиялтше тӱрлö экшыкым мыскара гоч койдарен ончыктена. Мурылаште мутымат шканна келшышын вашталтылына. Вургемнаже гына нунын семынрак коеш.

— Ты шотышто ончышо-влак мом ойлат?

— Удам нимат огыт ойло. Мöҥгешла,  ик «кувадаже» ялтак «у руш кува-влак” гыч Цветочекше гай коеш! маныт.

— Номерлаштыда те секс манме йодыш нерген южо татыштыже путырак тура муреда, ойлыштыда. Шоҥгырак-влак ты шотышто вурсен ойлен огытыл? Шкандаже вожылмыла огеш чуч?

— Тӱҥалтыште йöндымыракынак чучын. Адакшым тӱрлым ойлышо-влакшат лийыныт. Иктышт «пыльдырий-шамыч» маныныт, весышт «молодец улыда» манын мокталтеныт. Ойлат, вет парня ден парнят икгай огытыл. Мемнан шотыштат еҥ-влакын шонымашышт тӱрлö, санденак вараже тунемалтын. Сценышке лектат,  да чыла вожылмет мондалтеш, артист улметлак веле чучаш тӱҥалеш.

— Тыгай нерген мурен, кутырен шогылтмыда шотышто марийда шылтален але вурсен огеш ойло?

— Уке-е. Тудо мыйым умыла. Умылышо огеш лий гын, группышто выступатленжат ом керт ыле.

— Йӱмö, ӱдырамаш ден пöръеҥ кокласе кылым койдарен ончыктымо деч посна ончыкыжым номерлаштыда эше могай йодыш-влакым тарваташ шонеда?

— Шукерте огыл Йошкар-Олаште «Госпожа совершенство» моторлык конкурс эртаралте. Тушко 40 деч кугурак ийготан ӱдырамаш-влак ушненыт. Меат тыгайрак сынан мыскарам ямдылаш шонена. Меат модель манмет лийына. Тиддеч поснат шонымашна ятырак.

Л.Камалетдинова мутланен

Налмывер: «Марий Эл» жаплышташ

10 комментариев

Filed under Артикль-влак

10 responses to “«У марий кува-влак» секс нерген туран мурат

  1. Петан

    Мари-влак «секс» нерген, «кутанла-вуйла» нигунам йӱкын, калык ончылно ойлен огытыл. Те, «новые русские бабки»- влакын кодшо кочышшым кочкыда, да тиде ден куанеда. Творческий кӱчызӧ-влакышке савырнеда докан. Марлашке, кеч москон, кеч одессан мыскаражым кусарыза, тудо мари сынан огеш лий! «Жалкое подражательство», оҥарыше-влак. Чыла россий юмор — пыст, намыс. Кӧм оҥареда, воштылыда? — Шкендам воштылыда!!!

  2. Чачави

    Петан, кызыт оҥарымашыже марий поп-культурышто пеш кугу верым налеш. Марий Элыш кает гын «Марий Эл радиом» колышт. Йот, руш йылме гыч марлаш мурым кусарат, мыскарам. Йӧра мутшым кусарат, йужо марий мурызыжо вет еҥын койышыжымат сотара. Адакшым ынде марла руш акцент дене мураш «модныйыш» савырна. Мутат уке, марий поп-культурымат вияҥдаш кӱлеш, но тыге марий тӱвырана «попа-культурыш» ок савырне?

  3. Петан

    Илышна, пуйто шикшан, аяр пушан олаште илена. И Японий гае, мылана да яллан «кислородный маска» лийын марий муро, марий эстрада. Ынде «икымше рэперна», поп-культурына (тиде «поп лийше», камвозымшо, докан), «марийскоязычный» мурызо-влак уло. Поян улына!!?? — Уке!!! Мемнан шортньо теҥгена лийын, ме тудым лу вичырашлан вашталтенна, куанена — Лу оксана уло! «Марий Эл радиошто» ыштышаш улыт марий культурын «фанатикше-влак», а коммерсант чонан огыл. Мер пашаште марий-влакым пызырышт, школышто марий шӱлыш ыш код, ынде тӱвыра гыч темден лукнешт. Тыгай паша трук огеш ышталт, ик ошкыл ден чакнена. Ида чакне!

    • Андрей

      Петан, а тый кӧ нерген ойласет? (коммерсант чонан шотышто)

    • Андрей

      Ляпкаш гына кертына — а иктаж-могай сай пашам ышташ? Нигӧ уке…

      • ЧЫНмари

        Андрей да тыйын командет гыч еҥ-влак, конешне, те гына мемнан пашам ыштеда, молыжо чылан «ляпкен гына шинчат»… Мыняре мый тыйым палем, тый оксаде марий калык верч парнядымат от тарвате. Юмылан тау оксан пашате улат да марий калыклан порымат ыштен кертат. Вес марий-влакшым адак йöршын аҥыралан ит шотло, тендан оксан проектда-влак верч нигö яра пашам ыштышаш огыл.

      • Андрей

        ЧЫНмари, тий витне окса нерген эре шонет.

        Тыге ит ыште, кӧргӧ гыч шкетым кочкын пытарет…

      • ЧЫНмари

        Тый дечет шукырак ом шоно. Калыкым мер пашалан, яра (добровольный) пашалан кумылаҥдыман, шылтален да вурсен ыштышыжымат кораҥдаш лиеш. Мый тендан «Ляпкаш гына кертына» мутдам ынде мыняр гана колам, пуйто те гына пашам ыштеда.

      • Андрей

        Тый тыге ойлет, пуйто тый мыйын нерген шукырак палет, мыйын дечемат…

        Ит воштылто….

    • Андрей

      Петан, толат мо Марий Эл Радиош пашаш?

      «Фанатик» семын…

      Уло кумыл дене налына.

      Мемнан телефон номер: 63-03-65.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s