Марий почеламут ныл йылме дене йоҥгалтеш

Шукерте огыл Эстонийыште кок марий поэтессын почеламутшым ныл йылме дене книга семын савыктен лукмо.

Кодшо кечылаште поэтесса да журналист Татьяна Пчёлкинан кок книгаже ош тӱням ужо, воза «Кугарня» газет.

Иктыже Таллинныште иканаште ныл йылме дене (эстонла, марла, рушла, англичанла) савыкталтын. «Tulen helluses / Ныжыл лийын толам / Нежностью буду / With tenderness I´ll come» почеламут сборникым Эстонийысе Родо-тукым калык-влак программын полшымыж дене лукмо. Мотор кӱжгӧ коман, шке шотан сӱретан книга.

Весыжым Марий кундемыштына савыктыме. «Корнывожышто вашлиймаш» книгаш Татьянан пытартыш жапыште возымо сылнымут саскажым пуртымо.

Поэтессын кажне почеламутыштыжо – илыш, тудын нерген кумдан да келгын шонкалымаш.

Чылаже финн-угор серыше-влак конгресс вашеш Эстонийысе родо-тукым программе окса дене лу наре российысе финн-угор писатель-влакын книгаштым лукмо, тушеч кумытшо марла.

Т. Пчелкинан книгаж гайяк Албертина Иванован ныл йылме дене «Sonaat viiulisoolole / Соло скрипкалан соната / Соната для скрипки соло / Sonata for a violin solo» почеламут погыжым лукмо.

Курык марла Вийви Луйкын «Шӹмшӹ тыр шошым» романжым савыктыме, эстон йылме гыч Валерий Аликов кусарен.

Албертина Иванован книгаж гыч лаштык (кугемдашлан темдал):

MariUver