«Fenno-Ugria тӧнеж» парышдыме ушемыш типографий гыч Soome-ugri sõlmed 2025 («Финн-угор кыл 2025») ий еда лектын шогышо луктышын свежа выпускшо толын шуын, Йаак Прозес Facebook мервотышто увертара.
Савыктышын 272 лаштыкыштыже тичмаш статья-влакым, верлаш шымлаш коштмо паша-влак нерген иктешлымаш-влакым да родо-тукым калык-влакын тӱвырашт нерген материалым погымо.
Погын тӱҥ редакторжо Тайсто Раудалайнен лийын, а автор-влак коклашке Эстоний да моло элла гыч эксперт-влак улыт, нунын коклаште Ханнеле Валкеэниеми, Аймар Вентсель, Оршойя Шильд (Orsolya Sild) да Отть Курс.
У выпускышто тӱҥ верым обь угор-влакын – хант ден манси-влакын – тӱняштлан верым ойырымо. Книгаште кумдан палыме шымлызе да тӱвыра пашаеҥ-влак Кальо Пыллу, Пауль Аристэ да Вельо Тормислан пӧлеклалтше лӱмгече публикаций-влак посна верым налын шогат.
Тыгодым кызытсе погышто ончычсо номер-влак дене таҥастарымаште финн-угор калык-влак шумлык политике процесслан кугурак тӱткышым ойырымо.
Савыктышын презентацийже пеледыш тылзын 3-шо кечынже 18 шагатлан «Фенно-Угрийын» пӧлемлаштыже лиеш, тушто книгам верыштак налаш лиеш. Погым ужалыме да кузе тудын дене пайдаланаш лийме нерген увер тыгак ушемын официалле вот- да Facebook лаштыклаштыже савыкталтеш.
MariUver
MariUver 