Марий Эл У Роҥго район Ӱшнӱр селаште кодшо ийын ноябрь тылзыште администраций ден ялысе клубын оралте омсажым виш ыштен. Тидын нерген «Марий Эл» газет увертара.
Зданийын кок могырыштыжат ты кундемын историйже ден мифологийже, Изи Кундыш эҥер дене кылдалтше стенд-влакым вераҥдыме. Клуб ден администраций йыр ыштыме кумдык рӱдыштӧ Кундыш Кугызан скульптуржым, марий буква, тамга дене кылдалтше инсталляцийым, марий тӱран аралтышым ужаш лиеш.
Шкешотан паркыште ты кундемысе палыме еҥ-шамычлан пӧлеклалтше стенд-влак улыт. Ты кундемын шочшыжо, лӱмлӧ композитор Анатолий Лупповлан пӧлеклалтше лукат уло.
– У оралтым 2025 ийыште чоҥаш тӱҥалыныт. Тунам клубым Станислав Волков вуйлатен. Моткочак писын ыштен шуктеныт. 4 ноябрьыште тудым пайремлын почыныт. Ик оралтыштак администраций, клуб, книгагудо верланеныт. Чаманен каласем, культорганизаторна уке. Ӱшанена, илен-толын, специалистна лиеш. Эртарыме икымше кугу мероприятийна Аван кечыжлан пӧлеклалтын ыле. Тудо поро шӱлышан лийын, калыклан моткоч келшен. Вес кундемысе клубла денат кылым ыштыме, мемнан деке Морко район гыч артист-влак толыныт ыле, – мане клуб вуйлатыше Елена Иванова.
Клуб пелен тӱрлӧ кружок уло. Мутлан, «Шӧртньӧ кид» кружокыш йоча-влак кумылын коштыт, Галина Волкован вуйлатыме «Ӱшнур сем» ансамбль пашам ышта.
Семӱзгарат ситышын. Почмо деч ончыч сылнысем синтезаторым, гармоньым, баяным пӧлекленыт. Компьютер ден принтерат уло, артист-влаклан грим-пӧлемым келыштарыме. Залыш иканаште 80 еҥ пура. Икманаш, верысе тӱвырам вияҥдаш да нӧлташ сай йӧным ыштыме, воза «Марий Эл» газет.
MariUver
Фото: MariMedia и др.
MariUver 