Российыште, финн-угор тӱняште кумдан палыме марий шанчызе-этнолог Тамара Лаврентьевна Молотован (16.05.1956–01.12.2025) шӱмжӧ кырымым чарнен, увертара «Марий Эл» газет «КонтактЫште» мервотышто.
Марий Эл наукын сулло пашаеҥже, Марий Эл Кугыжаныш премийын лауреатше, «Марий Эл ончылно суаплан» орденын медальже дене палемдалтше шымлызе 250 утла шанче пашан авторжо.
Тамара Лаврентьевна ӱмыржӧ мучко марий калыкын вургемжым, тӱржым, йӱлажым, кочкышыжым да моло ойыртемжым шымлен. Кугезына-влакын ыштыш-кучышыштым, тӱвыра поянлыкыштым науко могырым радамлен, калыкыш луктын, ятыр форумышто эксперт семын лийын, докладым ыштен, ой-каҥашыж дене полшен.
Редакций лӱм дене лишыл еҥже ден родо-тукымжылан, пырля пашам ыштыше шымлызе йолташыже-влаклан келге чаманымашым каласена, воза «Марий Эл» газет.
MariUver
MariUver 