Республикыштына войзымо тичмаш метражан у фильмын премьерже вашке лиеш. «Последний лепесток» мюзиклым икымше гана 13 сентябрьыште проектын участникше ден унаже-влаклан ӱжмаш почеш Эрик Сапаев лӱмеш опер да балет академле театрыште ончыктат, увертара «Марий Эл» газет.
А кумылан-влаклан тудым идым тылзын 18-ше кечынже Самырык-влак полатыште ончаш темлат.
У проектым Марий Эл тӱвыра министр Константин Ивановын темлымыж почеш 2023 ийыште илышыш шыҥдараш тӱҥалыныт.
Сылнысеман фильмым войзымаште республикнан уста шочшыжо-влак: семлызе Григорий Архипов, куштымашым шындыше Ирина Шаймарданова, сӱретче Иван Богомолов да молат тыршеныт. Режиссёржо – Россий кинематографист ушемын еҥже, Самырык-влаклан Олык Ипай лӱмеш премийын лауреатше Андрей Огородников.
Кином войзымаште 766 еҥ тыршен. Проектыш республикысе талантан икшыве-влакат ушненыт. Фильмыште рольым Иван Палантай лӱмеш тӱвыра да сымыктыш колледжын студентше ден Калыкле сымыктыш гимназийын тунемшыже-влак модыт. Нунын радамыште хореограф, мурызо, актёр да семмастар-влак улыт. Нунак мурым да семым возымаште полшеныт.
Съёмкым эртараш Марий Элысе Креативле индустрий школын тунемшыже ден опер да балет театрын пашаеҥже-влак полшеныт, воза «Марий Эл» газет.
MariUver
Фото: «ВМарийЭл» тӱшка «КонтактЫште» мервотышто
MariUver 