Сылнымут конкурс нерген книга лектын

Марий Элын да Россий Федерацийын сулло журналистше Юрий Исаков «Колумб лудмаш» книгам ямдылен. У савыктыш марий поэт Валентин Колумбын шочмыжлан 90 ий да «Марий Эл» газет лекташ тӱҥалмылан 110 ий теммылан пӧлеклалтын.

Книгашке «Колумб лудмаш» сылнымут конкурсын пӱтынь историйже пурталтын. У савыктышым Марий книга издательствыште налаш лиеш, воза «Ямде лий» газет.

Книга дене палдарыме презентаций эн ончычак Йошкар-Олаште Республикысе йоча ден самырык-влакын В. Колумб лӱмеш книгагудышто 20 майыште лийын.

Туштак В. Колумбын 90 ияш лӱмгечыжлан пӧлеклалтше ола кӱкшытан лудмаш эртен. Лудмашке тӱҥ шотышто йочасадыш коштшо да школышто тунемше-влак ушненыт. Ончыч лудмаште таҥасыше, кызыт вузлаште тунемше студент-влакат толыныт.

Вес арняштак, 23 майыште, Морко рӱдӧ книгагудышто презентаций лийын. Тушко районысо книгагудо-влакын пашаеҥышт, школласе туныктышо ден тунемше, В. Колумб лудмашын чолга еҥже-влак погыненыт, воза «Марий Эл» газет.

MariUver

Фото: «Марий Эл» газет, Морко рӱдӧ книгагудо