Эстон марий-влак Тиште кечым палемденыт

Эстонийыште илыше марий-влак таче, 14-ше декабрьыште, Марий тиште кечым да Изи Роштом Тартушто палемденыт. Тидлан нуно Савыктымаш да кагаз сымыктыш TYPA рӱдерыш погыненыт.

Ончыч, кок тӱшкалан шелалтын, гид-влак тоштер мучко кок ужашан экскурсийым эртареныт. Мемнан группылан тӱҥалтышыште кузе савыктымаш шочын да вияҥ толмо нерген каласкаленыт. Гид тӱрлӧ жапысе шрифт, печатлыме станок-влакым ончыктен. Кузе нуно ыштат умылтарен да южо машинажым колтенат ончыктен.

Тыгак кузе книган посна лаштыклажым пӱчкеденыт да погеныт умылтареныт.

Кокымшо ужаш кагаз ыштымылан пӧлеклалтын. Кушто да кузе ожно возеныт. Тыгак кагазым кузе ыштыме принципым умылтареныт. Да тошто вургем да кагаз лаштыкла гыч кагазым шкет ыштен ончаш йӧн лийын.

Экскурсий мучашыште кумылан-влак марий да финн-угор тӱрлемым картонеш шке печатлен кертыныт.

Кугыеҥ-влак тыгак марла диктантым сереныт. Йоча-влак мастар классыште блокнотым ышташ тунемыныт.

Вара чылан пырля кофем, чайым подыл ойлен шинченыт.

Пайремым «Таллинн марий ушем» вуйверын еҥже Жанна Тохт ямдылен. Тудлан рӱдоласе да Тартусо марий организаций-влакын чолгаеҥышт-влак полшеныт.